Halyqty ózge aımaqtarǵa kóshirý baǵdarlamasyn túbegeıli qaıta qaraý kerek - Memleket basshysy
«Úkimetke ishki ekonomıkalyq resýrstardy jumyldyratyn jańa tásilder ázirleýdi tapsyramyn. Bul rette, halyqty ózge aımaqtarǵa kóshirý baǵdarlamasyn túbegeıli qaıta qaraý kerek.
Biz tarıhı Otanyna oralǵan qandastardy tolyq qoldaımyz. Biraq, tek Mańǵystaý óńirimen shektelýge bolmaıdy. Basqa oblystarǵa, sonyń ishinde óndirisi damyǵan aımaqtarǵa qonystanýǵa bolady. Biz qajetti jaǵdaıdy jasaýǵa daıynbyz», - dedi Prezıdent.
Qasym-Jomart Toqaevtyń aıtýyna qaraǵanda, qazirgi zamanda óńirlerde, elderde, tipti qurlyqtarda jumys kúshiniń kóshi-qony júrip jatyr.
«Bul zańdy qubylysqa aınaldy. Osy úrdiske bizdiń azamattar da úırenýi kerek. Kórshi elderdiń azamattary bul jaǵdaıǵa jaqsy beıimdeldi. Biz qandastarymyzdyń barlyq salada, sonyń ishinde memlekettik qyzmette jumys istegenin qalaımyz. Olar Jańa Qazaqstandy qurýǵa óz úlesin qosady dep senemin», - dedi Memleket basshysy.
Aıta keteıik, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Buǵan deıin Prezıdent halyq sany kóbeıgen saıyn turaqty jumys oryndary ashylýy kerektigin, biraq Mańǵystaý oblysynda osy másele eskerilmeı, jónsiz júrgizilgen kóshi-qon saıasatynyń saldarynan kúrdeli ahýal qalyptasyp otyrǵanyn aıtty.
