Halyqty evakýatsııalaý qajettiligi joq – Danıal Ahmetov ShQO-daǵy órtter týraly
ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov iri dala órtteri shyqqan aýdandarǵa baryp, qazirgi jaǵdaımen tanysty, dep habarlaıdy QazAqparat tilshisi.
Qazirgi ýaqytta óńirdiń birneshe aýdanynda iri dala órtterimen kúres júrip jatyr. Atap aıtqanda, qyzyl jalyn Altaı aýdanynda 700 gektarǵa, Kúrshim aýdanynda 300 gektarǵa, Glýbokoe aýdanynda 35 gektarǵa jaıylǵan. Sol jerlerde órt sóndirýshiler, polıtseıler, áskerıler, ormanshylar men jergilikti atqarýshy organ qyzmetkerleri damylsyz jumys isteýde.
Aımaq basshysy Danıal Ahmetov órt bolǵan aýdandarǵa baryp, qazirgi jaǵdaımen tanysty. Onyń aıtýynsha, órt oshaqtaryna jaqyn ornalasqan aýyldardan halyqty evakýatsııalaý qajettiligi joq.
«Búgingi tańda oblysta órt qaýiptiligine baılanysty besinshi sanatty kúrdeli jaǵdaı qalyptasýda. Jaqynda ǵana Zaısan aýdanyndaǵy órt sóndirilgen bolatyn. Alaıda qazir úsh aýdanda ottyń beti qaıtpaı jatyr. Jaǵdaı turaqty baqylaýda. Altaı aýdanynda órtti joıý úshin MI-8 tikushaqtary jáne AN-24 ushaǵy iske qosylǵan. Turǵyndarǵa tónip turǵan qaýip joq, olardy evakýatsııalaý josparlanbaǵan. Barlyq óńir turǵyndaryna aıtarym – qazir qaýipti órt jaǵdaıy ystyq aýa raıymen kúrdelene túsýde. Sondyqtan ashyq jerlerde ot jaqpaý jáne abaı bolý qajet. Joǵary jaýapkershilik tanytsaq, aýyr jaǵdaıdyń aldyn alýǵa bolady», - dedi ShQO ákimi.
Eske salsaq, Altaı aýdanynda 2 qyrkúıek kúni shyqqan dala órti 700 gektarǵa jaıylyp ketti.
Kúrshim aýdanyndaǵy iri dala órtimen kúres búgin úshinshi kúnge sozylyp otyr.
Al Glýbokoe aýdanynda jalpy aýmaǵy 35 gektardy quraǵan tilsiz jaý 7 qyrkúıek kúni túngi ýaqytta shyqty.
Búgin Glýbokoe aýdanyna órtpen kúreske 200-ge jýyq áskerı qyzmetshi jumyldyryldy.
