Halyqty baspana alaıaqtarynan qalaı qorǵaýǵa bolady

ASTANA. QazAqparat - QR Bas prokýratýrasy notarıýstarǵa jyljymaıtyn múlik bazalaryna kirýge ruqsat berýdi usynyp otyr. Sonyń arqasynda baspanamen baılanysty alaıaqtyq áreketterdiń jolyn kesýge múmkindik bar. Alaıda oǵan deıin osy saladaǵy memlekettik organdardyń aqparattyq júıelerin bir-birine qosyp, retke keltirgen jón, dep habarlaıdy QazAqparat tilshisi.

«Negizi, notarıýstar úıdi satyp jatqan adamnyń menshik quqyǵyn, ıaǵnı buǵan deıin baspana kimniń atynda bolǵanyn jáne qalaı aýdarylǵanyn teksera alsa, osy saladaǵy alaıaqty áreketterdi azaıtýǵa bolady. Máselen, úıdi alatyn adam qosymsha aqy tólep, menshik quqyǵyn jan-jaqty teksere alatyndaı jaǵdaı jasaýǵa bolady. Alaıda ol úshin notarıýstarǵa tıisti aqparattyq júılerge kirýge, odan qajetti málimet alýǵa ruqsat berý kerek. Sosyn naqty bir úıge qatysty barlyq qujattar biryńǵaı bazada saqtalýy shart. Osynyń arqasynda kez kelgen notarıýs jyljymaıtyn múliktiń menshik quqyǵyn teksere alady», - dedi QR Bas prokýrordyń orynbasary Andreı Lýkın zań-jobalaý qyzmeti boıynsha vedomstvoaralyq komıssııanyń kezekti otyrysynda.

Onyń aıtýynsha, búginde kelisimshartty rásimdegen notarıýstyń jaýapkershiligi de joq emes. Onyń saqtandyrý somasyna 2 mln teńge men múlik kiredi.

«Bizdińshe, alaıaqtyq bolǵan jaǵdaıda ol soma barlyq shyǵyndardy óteýge jetkiliksiz. Máselen, kórshi Reseıde bireý notarıýstyń kesirinen múlikten aıyrylsa, onda saqtandyrý kompanııasy 5 mln rýbl tólep beredi. Bizdiń aqshamen 25 mln teńgedeı bolady. Bul - ájeptáýir aqsha. Qazaqstanda bolsa, 12 ese tómen, 2-aq mln teńge. Oǵan jataqhana bólmesin de satyp ala almaısyń. Demek, aımaqtarda otyrǵan notarıattyq palatalar da óz ókilderin saqtandyrýǵa atsalysýy qajet», - dep atap kórsetti Lýkın.

Aıta ketken jón, respýblıkalyq notarıattyq palata atalǵan bastamaǵa qarsy emes. Alaıda eń aldymen aqparattyq bazalardy retke keltirý kerek. Notarıýstarǵa múlikke qatysty málimetterdi alýǵa ruqsat berilse, saqtandyrý somasyn da ulǵaıtýǵa ábden bolady.