Halyqtan zańsyz saqtalǵan qarýdy satyp alý aktsııasy jalǵasýda
NUR-SULTAN. QazAqparat - Bıyl 20 sáýirden bastap halyqtan zańsyz saqtalǵan atys qarýyn, oq-dáriler men jarylǵysh zattardy satyp alý aktsııasy ótkizilýde. Bul týraly QR Іshki ister mınıstrligi ótkizgen tikeleı efırdegi brıfıngide aıtyldy, dep habarlaıdy QazAqparat tilshisi.
«Bul aktsııanyń maqsaty - atys qarýymen jasalatyn quqyq buzýshylyqtardyń aldyn alý. Aktsııa bastalǵannan beri ishki ister organdaryna azamattar erikti túrde 619 birlik atys qarýyn, onyń ishinde 71 birlik – oıyq uzyn uńǵyly; 537 birlik – tegis uńǵyly; 11 birlik – travmatıkalyq; 1 snarıad; 14 283 qarýdyń patrondaryn tapsyrdy.
Barlyq tapsyrylǵan qarý esepke alý boıynsha tekserildi jáne krımınalıstıkalyq saraptamadan ótýde», - deıdi QR ІІM resmı ókili Nurdildá Oraz.
Onyń aıtýynsha, tapsyrylǵan qarý-jaraq úshin beriletin tólemniń aldyn ala somasy 58 mln.747 myń teńgeni quraıdy.
Eske sala ketsek, zańsyz saqtalǵan qarý-jaraqty satyp alý aktsııasy 20 sáýirde bastaldy. Ony ótkizýge respýblıkalyq bıýdjetten 95 mln. teńgeden astam qarajat bólindi.
Erejege sáıkes, zańsyz saqtalǵan atys qarýyn, oq-dárilerdi, jarylǵysh zattardy aqshalaı syıaqy úshin tapsyrýǵa nıet bildirgen azamat kez kelgen aýmaqtyq polıtsııa organyna ótinish bere alady.
