Halyqtan zańsyz saqtalǵan qarý-jaraqtardy satyp alý aktsııasy jalǵasady
ASTANA. QazAqparat – Halyqtan zańsyz saqtalǵan qarý-jaraqtardy satyp alý aktsııasy aldaǵy jyldary uıymdastyrylady. Bul týraly ІІM Ákimshilik polıtsııa komıteti Qarý aınalymyn baqylaý basqarmasynyń bastyǵy Asylbek Ydyrysov aıtty, dep habarlaıdy QazAqparat tilshisi.
«Qarý-jaraq zattary qaıdan paıda bolýy múmkin ekendigi jaıly aıtsaq, álbette olardyń kóbi – burynnan muraǵa qalǵan ne taýyp alynǵan nemese olardy tirkeý boıynsha shekteýdi engizgenge deıingi satyp alynǵan qarýlar. Mysaly, buryn 1970 jylǵa deıin qarýlar malshylarǵa ańnan qorǵaný úshin esepsiz taratylǵan. Barlyq tekseris is-sharalarynan keıin tapsyrylǵan qarýlar men oq-dáriler joıý protsesin beınejazbaǵa túsire otyryp, komıssııalyq túrde joıylady», - dedi basqarma bastyǵy mınıstrliktiń baspasóz alańynda ótken brıfıngte.
Onyń atap ótýinshe, joıý aldynda qarý bólshektenedi. Oqpandar men tetik bólshekterdiń eshqaısysy odan ári paıdalaný úshin jaramdy bolyp qalmaıtyndaı mehanıkalyq jolmen deformatsııalanyp, odan ári atýǵa jaramsyz qarý ónerkásip kásiporyndarynda balqytylady.
«Antıkvarlyq jáne tarıhı qundylyǵy bar qarý krımınalıstıkalyq bólimderdiń zattaı kollektsııalaryna nemese ІІM-niń murajaılaryna berilýi múmkin. Mundaı is-sharalardy ótkizýdiń ońtaıly tájirıbesin eskere otyryp, aktsııany aldymyzdaǵy jyldary uıymdastyrýdy josparlap otyrmyz», - Asylbek Ydyrysov.
