Halyqtan zańsyz qarýlardy satyp alýǵa baǵyttalǵan kezekti aktsııaǵa 321 mln. teńge bólindi
ASTANA. QazAqparat - 2014 jylǵy 21 sáýirden bastap, respýblıka aýmaǵynda halyqta zańsyz saqtaýly turǵan atys qarýyn, oq-dáriler men jarylǵysh zattardy satyp alý boıynsha kezekti aktsııa ótkiziledi, dep habarlaıdy Qazaqstan Respýblıkasy ІІM baspasóz qyzmeti.
"Atalǵan is-shara Qazaqstan Respýblıkasy Úkimetiniń 2007 jylǵy 26 jeltoqsandaǵy №1299 qaýlysymen bekitilgen Azamattar zańsyz saqtap kelgen atys qarýyn, oq-dáriler men jarylǵysh zattardy erikti túrde óteýsiz tapsyrý erejesine sáıkes júrgiziletin bolady.
Bul maqsatqa respýblıkalyq bıýdjetten 2014 jyǵa 321,2 mln. teńge bólingen», - dep jazylǵan habarlamada.
Mınıstrliktiń málim etkenindeı, aktsııa bólingen aqshalaı qarajattyń tolyq ıgerilgenge deıin jalǵaspaq. Zańsyz saqtalǵan atys qarý, oq-dáriler, jarylǵysh zattary bar azamattar olardy aktsııany ótkizý kezinde ishki ister organdaryna erikti túrde tapsyrýǵa bolady. Erikti túrde tirkelmegen atys qarýy, oq-dárilerdi jáne jarylǵysh zattardy tapsyrǵan adamdar qylmystyq jáne ákimshilik jaýapkershikke tartylýdan bosatylady.
Qarý-jaraq zattaryn erikti túrde tapsyrǵany úshin respýblıkalyq bıýdjetten qarýdyń ár birligine onyń tehnıkalyq jaı-kúıine baılanysty somasy onnan júzge deıingi aılyq eseptik kórsetkish tólem kózdelgen.
Atys qarýy, oq-dárilerdi jáne jarylǵysh zattardy qabyldaý árbir aýmaqtyq ishki ister organdarynda júrgiziletin bolady.
ІІM ótkiziletin aktsııaǵa turǵyndardyń qoldaýyna jáne oǵan belsendi qatysýyna senim artady.
Ótken jylda ótkizilgen aktsııanyń nátıjeleri boıynsha jalpy ishki ister organdaryna 7 myń azamat ótinishpen júgingen, olarmen aqshalaı syıaqyǵa erikti túrde 8 myń birlikten astam atys qarýy, 52 jarylǵysh qondyrǵy, 76 keli jarylǵysh zat, sondaı-aq sholaq myltyqtyń 773 myń oǵy tapsyrylǵan. Osynyń arqasynda 2013 jyly atys qarýymen jasalǵan qylmystar sany 11,4% tómendegen. 2014 jyldyń 3 aıynda atys qarýymen jasalǵan qylmystar sany 19,8% azaıǵan.
