Halyqtan medıtsınanyń qyzmet sapasyna qatysty 11 myń shaǵym tústi - vıtse-mınıstr
«Medıtsına jáne farmatsevtıkalyq baqylaý komıtetine túsken shaǵymdardy taldaý olardyń qysqarmaǵanyn, jekelegen jaǵdaıda halyqtyń medıtsınalyq kómek sapasyna shaǵymynyń artqanyn kórsetedi. Aıtalyq, birinshi jartyjyldyqta 2,8 myń shaǵym tústi. Faktilerdiń 30 paıyzy rastaldy», - dedi birinshi vıtse-mınıstr Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, keshe Densaýlyq saqtaý mınıstrliginde halyqtan medıtsınalyq qyzmet sapasyna kelip túsken shaǵymdardyń sebepteri talqylanǵan. Negizdi shaǵymdardy saralaý nátıjesinde qolaısyz óńirler anyqtalǵan. Osy óńirlerdiń densaýlyq saqtaý basqarmasy basshylaryna medıtsınalyq qyzmetterdiń sapasyn arttyrý jáne patsıentterdi qoldaý qyzmetteriniń jumysyn «osy jerde jáne qazir» qaǵıdaty boıynsha kúsheıtý úshin shuǵyl sharalar qabyldaý týraly tapsyrmalar berilgen.
«Sondaı-aq, tegin medıtsınalyq kómektiń kepildendirilgen kólemi/mindetti áleýmettik medıtsınalyq saqtandyrý aıasynda kórsetiletin medıtsınalyq qyzmetterdiń sapasyna taldaý jasaldy. Call-ortalyq halyqtyń máselelerin jedel sheshýge kómektesedi. Oǵan osy jyldyń birinshi jartyjyldyǵynda 400 myńnan astam shaǵym tústi. Ótken jyly dál osyndaı kezeńde 70 myńnan astam shaǵym túsken edi. Bul rette, TMKKK/MÁMS aıasyndaǵy medıtsınalyq qyzmetterge shaǵym sany 1,7 esege – 6,5 myńnan 11,1 myńǵa deıin ósti. Máselen, 2022 jyldyń 1-shi jartyjyldyǵynda Áleýmettik medıtsınalyq saqtandyrý qoryna 11 myńnan astam adam medıtsınalyq qyzmetter sapasynyń tómendigine, medıtsınalyq qyzmetter kórsetýden bas tartýǵa, dári-dármekpen qamtamasyz etýge qatysty shaǵym tústi. Shaǵymdardyń 80 paıyzyna medıtsınalyq qyzmetkerlerdiń, medıtsınalyq uıymdar basshylyǵynyń nashar qarym-qatynasy sebep bolyp otyr. Patsıentti qoldaý qyzmetteriniń jumysyn medıtsınalyq uıymdardyń basshylyǵy da, densaýlyq saqtaý basqarmalary da tıisti túrde baqylamaıdy», - dedi Jandos Búrkitbaev.
Foto: ortcom.kz
