Halyqtan benzın naryǵyndaǵy problemalar úshin keshirim suraýymyz qajet - Bozymbaev

ASTANA. QazAqparat - Halyqtan benzın naryǵynda oryn alǵan problemalar úshin keshirim suraýymyz qajet. Mundaı pikirdi búgin QR Úkimetiniń selektorlyq rejimdegi otyrysynan keıin Energetıka mınıstri Qanat Bozymbaev bildirdi, dep habarlaıdy QazAqparat.

«Men osy Úkimettiń mınıstrimin. Taǵdyrym Prezıdenttiń qolynda tur. Memleket basshysy qalaı aıtsa, men solaı isteımin. Bul jerde qoldy túsirýdiń qajeti qansha. Jaǵdaı oryn alyp otyr, ony tez arada retke keltirýimiz, halyqtyń aldynda elimizde osyndaı problema týyndaǵany úshin keshirim suraýymyz qajet. Biraq, onyń da obektıvti sebepteri boldy», - dedi Qanat Bozymbaev BAQ ókilderiniń benzın tóńireginde oryn alyp otyrǵan jaıtqa baılanysty otstavkaǵa ketýińiz múmkin be degen saýalyna oraı.

Sonymen qatar ol QR Premer-Mınıstri Baqytjan Saǵyntaevtyń sógis berý úshin Elbasy Nursultan Nazarbaevqa usynyshat joldaıtyndyǵyna qatysty pikirin de bildirdi .

«Premer-Mınıstr meniń tikeleı basshym. Sondyqtan ony talqylaıtyn eshqandaı múmkindigim joq», - dedi Bozymbaev.