Halyqtan atys qarýyn satyp alý naýqany aıaqtaldy
Bul týraly QR Іshki ister mınıstrliginiń ókili Shuǵyla Turlybek aıtyp berdi.
«Іshki ister mınıstrliginiń halyqtan zańsyz saqtalǵan atys qarýyn, oq-dárilerdi jáne jarylǵysh zattardy satyp alý boıynsha ótkiziletin jyl saıynǵy aktsııasy aıaqtaldy. Shara qorytyndysy boıynsha ishki ister organdaryna 1 087 azamat júginip, 1 400 dana atys qarýy men 10 myńǵa jýyq patrondy óz erkimen tapsyrǵan», - dedi Іshki ister mınıstrliginiń ókili aptalyq onlaın brıfıngide.
Óz erkimen tapsyrylǵan qarýdyń jaı-kúıine qaraı ár danasy úshin 10 aılyq eseptik kórsetkishten (31 800 teńge - red.) 100-AEK-ke deıin (318 000 teńge -red.) tólem berý kózdeledi.
Aıta keteıik, bul aktsııa 2008 jyldan beri júrgizilip keledi, osy ýaqyt aralyǵynda azamattar 54 myńnan astam atys qarýyn, 2 mln astam patrondy óz erkimen tapsyrdy.
Keıingi 5 jylda atys qarýymen jasalǵan qylmystardyń sany 43%-ǵa tómendegen.
Ashyq kózderden alynǵan foto
