Halyqpen jumys istegende atústilik pen salǵyrttyq bolmaýy kerek - Darıǵa Nazarbaeva
AQTÓBE. QazAqparat - Senat Tóraǵasy Darıǵa Nazarbaeva Aqtóbe oblysyna jumys sapary barysynda oblystyq máslıhat depýtattarymen kezdesti, dep habarlaıdy QazAqparat Senattyń baspasóz qyzmetine silteme jasap.
Senat basshysy depýtattardy máslıhattardyń qurylǵanyna 25 jyl tolýymen quttyqtady. D.Nazarbaevanyń aıtýynsha, ókildi organdar jergilikti memlekettik basqarý júıesinde asa mańyzdy ról atqarady.
Senatta aımaqtarmen yntymaqtastyqty arttyrýǵa arnalǵan jergilikti ókildi organdarmen ózara is-qımyl jónindegi keńes jumys isteıdi. Senat máslıhattardyń rólin odan ári nyǵaıtý jáne máslıhat hatshysynyń mártebesin arttyrý, sondaı-aq bosatylǵan negizde qyzmet atqaratyn depýtattar ınstıtýtyn engizý jóninde úkimetke usynystar toptamasyn ázirledi. Onyń bári «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańǵa túzetýlerde kórinis tapty. Darıǵa Nazarbaeva máslıhat depýtattaryn qujatty belsendi túrde talqylaýǵa shaqyrdy.
Senat Tóraǵasy máslıhat janyndaǵy Qoǵamdyq keńes múshelerimen kezdesýde olardyń jumysynyń derbestigin arttyrý qajettigin atap ótti.
«Biz Senattyń janynda jergilikti ókildi organdarmen ózara is-qımyl jónindegi keńes qurdyq jáne oǵan zor úmit artyp otyrmyz. Máslıhatpen baılanys tyǵyz ári belsendi jáne ekijaqty bolǵanyn qalar edik», - dep atap ótti D.Nazarbaeva.
Senat basshysynyń pikirinshe, halyqpen jumys jasaýdyń jańa turpaty kerek bolady, jurtshylyqtyń qatysýymen kóshpeli otyrystardy úzdiksiz ótkizip, jasalǵan jumystar týraly resmı saıttarda ǵana emes, áleýmettik jelilerde de keńinen jarııalaý qajet. D.Nazarbaeva bul rette osy jumystar atústi jasalmaı ári sóz júzinde qalmaı, naqty mazmunǵa ıe bolýy kerektigin atap ótti.
D.Nazarbaeva ulttyq mádenı ortalyqtar basshylarymen sol kúngi bolǵan kezdesýde aımaqtardaǵy assambleıalardyń mártebesin nyǵaıtýdy, atap aıtqanda jastardy mádenı ortalyqtar jumysyna tartý, sondaı-aq túrli ult ókilderi úshin áleýmettik lıft júıesin qurý máselelerin talqylady.
