Halyqpen tikeleı jeli arqyly tildesetin QR Prezıdentine alǵashqy saýal kelip tústi
ASTANA. Qazannyń 30-y. QazAqparat /Arman Asqarov/ - Qarashanyń 13-i kúni Elbasy Nursultan Nazarbaevtyń tikeleı jeli arqyly qazaqstandyqtardyń saýaldaryna jaýap berýine baılanysty elordadaǵy Beıbitshilik jáne kelisim saraıynda ornalasqan Baılanys ortalyǵyna alǵashqy saýal tústi,
dep habarlaıdy QazAqparat.
Almaty qalasynan habarlasqan ardagerler keńesiniń tóraıymy Maıra Rahmetýlına ózi turyp jatqan 2 shaǵyn aýdany 37 úıdi «Jol kartasy» aıasynda abattandyrýǵa bólingen 2 mln. 311 myń 857 teńgeniń maqsatsyz jumsalǵandyǵy týraly málim etip otyr. Onyń aıtýynsha, atalǵan turǵyn úıdiń aýlasy syn kótermeıdi - joly jóndelmegen, trotýary men jaryǵy joq. «Bizdiń barmaǵan jerimiz, baspaǵan taýymyz joq. Qala ákimi Ahmetjan Esimov bul máselege atústi qarap otyr. Sondyqtan osy máseleni Prezıdent bilse eken deımiz»,-deıdi M.Rahmetýlına.
Aıta keteıik, Prezıdenttiń halyqpen tikeleı jeli arqyly tildesýine deıin 14 kún qaldy. Dál osy ýaqytqa deıin Baılanys ortalyǵyna 5 suraq kelip tústi.
