Halyqpen 24 saǵat baılanysta: ýchaskelik polıtseı jumysy jaıly aıtty

PETROPAVL. QazAqparat – Petropavldaǵy 13-shi ýchaskelik polıtsııa pýnktiniń ınspektory Stanıslav Alıfırenko byltyr Memleket basshysynyń aldynda barlyq ýchaskelik ınspektorlardyń atynan pandemııa kezinde atqarylǵan jumys týraly baıandady, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, Petropavldaǵy 13-shi ýchaskelik polıtsııa pýnktiniń ýchaskelik ınspektory Stanıslav Alıfırenko byltyr ótken «Biz birgemiz» onlaın forýmyna qatysty. Memleket basshysynyń aldynda ýchaskelik polıtseıler atynan pandemııa kezinde atqarylǵan jumys týraly baıandady.

Polıtsııa aǵa leıtenanty ýchaskelik ınspektor laýazymynda 2 jyldan astam qyzmet etip keledi. Ákimshilik ýchaskede turǵyndar óz ınspektorlaryn jaqsy tanıdy jáne oǵan túrli máselemen kún-túni habarlasady. Kóp jaǵdaıda adamdar tynyshtyqty buzǵandarǵa shaǵymdanady eken.

Stanıslav Alıfırenkonyń jumys kúni saǵat 8.30-dan bastalady. Eń aldymen eseptegi adamdardy tekseredi. Túzetý mekemelerinen bosap shyqqandardyń, shartty túrde bosatylǵandardyń jumys isteýi de ýchaskelik polıtsııa ınspektorynyń nazarynda. Sondaı-aq, esepte maskúnemder, nashaqorlar da bar.

Tártip saqshysy qyzmet kórsetetin ákimshilik ýchaskede 3,5 myńnan astam adam turady. Ýchaskelik ınspektor turǵyndardyń basym kópshiligin jaqsy tanıdy. Qylmys jasaǵandar polıtseılerdiń únemi erekshe baqylaýynda.

«Jumysta kóp ýaqyt ótkizemiz, aıtarlyqtaı qıyndyqtar joq, tek únemi jumysta bolý kerek. Ýchaskede tynysh bolý úshin jumys isteý qajet. Jaqsy nátıjege qol jetkizý úshin barlyq jaǵdaı jasalǵan», - deıdi Stanıslav Alıfırenko.

Petropavl qalasynda 13 ýchaskelik polıtsııa pýnkti jumys isteıdi. №13-inshi polıtsııa pýnkti 10 jyl buryn jańa yqshamaýdanda ashylǵan. Bunda qazir ýchaskelik 5 polıtsııa ınspektory qyzmet etedi. Olardyń barlyǵy beınejetondarmen, planshettermen jaraqtandyrylǵan.