Halyqqa jyl saıyn 40 myń jer telimin taratýymyz qajet - Marxabat Jaıymbetov

ASTANA. QazAqparat - QR Investıtsııalar jáne damý mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marxabat Jaıymbetov bıyl beriletin jer ýchaskeleriniń sanyn naqtylady, dep xabarlaıdy QazAqparat tilshisi.

Komıtet basshysynyń aıtýynsha, bıyl qarjy bólinse, kem degende, 40-50 myń jer ýchaskesine ınfraqurylym jelilerin tartý josparlanǵan. «Qazirgi kelgen 40 mlrd-tyń ishinde 15 mlrd teńgeni ǵana JTQ-ǵa (jeke turǵyn úı qurylysy), ıaǵnı 15 myń ýchaskege (ınjenerlik jelilerdi tartý úshin - avt.) dep otyr. Bul - ákimdikterdiń esebi. Negizi, biz taǵy da 40 mlrd alamyz dep otyrmyz. Óıtkeni jyl saıyn «Nurly jer» boıynsha 80 mlrd teńge berilýi kerek. Biz, kem degende, 40 myń ýchaskege ınfraqurylym aparýymyz qajet. Ákimdikter áli de óz esepterin beredi. Qazirgi qujattar boıynsha 15 myń ýchaske beriledi degen jospar bar. Jalpy, osy kórsetkishti 40 myńǵa deıin jetkizýimiz kerek», - dedi M.Jaıymbetov QazAqparat tilshisine bergen suxbatynda.

Onyń sózine qaraǵanda, jer ýchaskeleri Almaty men Astana qalalarynan basqa barlyq oblystarda berilýi kerek. «Atalǵan eki qalanyń bas jospary boıynsha jeke turǵyn-úı qurylysy úshin jer joq. Basqa óńirlerdiń bárinde beriledi», - dep atap kórsetti M.Jaıymbetov.