Halyqqa tiri sóz, jandy sóz kerek - professor Negımov
ASTANA. QazAqparat - Halyq aýyz ádebıetin zertteýshi ǵalym, professor Serik Negımovtiń oıynsha, búgingi zııaly qaýymǵa áńgimeshildik óner jetispeıdi.
Al xalyqtyń rýxanııatyn kóterý úshin bilgenińdi jetkize bilý kerek, dep xabarlaıdy QazAqparat tilshisi.
"Qazirgi zamanǵa keregi - áńgimeshildik. Ol - jaı áńgimeshildik emes, kádimgideı mánimen, mazmunymen, tereńdigimen aıtylatyn áńgime. Bizdiń zııalylarymyzda osy jaǵy kemshin. Ol - barshamyzdyń kemistigimiz. Urpaqty qalaı tárbıeleý kerek? Búgingi jastarǵa "ana kitapty oqy, myna kitapty oqy" dep aıtqan durys. Biraq sen de sony eliktire bilýiń kereksiń. Mysaly, Abaı Qunanbaev, Spandııar Kóbeev, Beket Ótetileýov, Qudaıbergen Jubanov, Axmet Baıtursynov, Muxtar Áýezov, Qajym Jumalıev - osylardyń bári bilgenderin tamasha etip jetkize bilgen ǵoı. Mine, mektep pen dástúrdiń bolýy osyǵan baılanysty. Sondyqtan úlken bir jaýapkershilik kerek. Kezinde kórdik qoı, Sábıt Muqanovtar, Ǵabıt Músirepovter, keshegi Salyq Zımanovtar búkil bir aýdıtorııany uıytyp, til tabysyp ketetin. Marqum Ábish Kekilbaevtar qandaı boldy. Bizge qazir tiri sóz kerek, adamnyń júregine jetetin jandy sóz kerek", - dedi Serik Negımov QazAqparat tilshisine bergen suxbatynda.
Ǵalymnyń aıtýynsha, Uly Dalanyń burynǵy jyraýlary, aqyndary, kúıshileri, termeshileri, sal-serileri áńgimeshildik ónerdiń darabozdary bolǵan. Solardyń arqasynda xalyqtyń rýxanııaty kóterildi. "Biz oqydyq pa, tyńdadyq pa, sony qoldana bilýimiz kerek. Máselen, Abaıdy bilesiń, Shákárimdi bilesiń, Maǵjandy bilesiń, Sultanmaxmutty bilesiń, biraq ony óz isińde qoldanýyń kerek qoı. Mine, sonda qoǵam rýxanı jaǵynan jetiledi", - dep atap kórsetti ǵalym.
Aıta keteıik, Ulystyń Uly kúni - Naýryz meıramy qarsańynda professor Serik Negımov batanyń mán-mańyzy, onyń keıbir nusqalary týraly aıtyp berdi. Alaıda jazýshy Tólen Ábdiktiń oıynsha, bata qazirgi zaman talabyna saı bolýy qajet .
