Halyqqa tegin medıtsınalyq kómek kórsetýge qosymsha 541 mlrd teńge qajet
«Osy aptada ótken QR Parlamentiniń birlesken otyrysynda Elbasy áleýmettik medıtsınalyq saqtandyrýdy engizýge qatysty Úkimetke tikeleı birneshe tapsyrma berdi. Jalpy osy reformany joǵary deńgeıde ári tıimdi engizýge baılanysty kóp másele kóterildi. Sol máselelerdi talqylaýǵa jınalyp otyrmyz. Ózderińizge málim, áleýmettik medıtsınalyq saqtandyrýdy engizý 2015 jyly kóterilgen bolatyn. Sodan beri birneshe zańnamalyq akti qabyldanyp, kóp jumys atqaryldy. Qoǵamda bul másele jan-jaqty talqylandy», - dedi jıyndy ashqan QR Densaýlyq saqtaý mınıstri Eljan Birtanov.
Kelesi kezekte sóz alǵan QR Densaýlyq saqtaý vıtse-mınıstri Lázzat Aqtaeva medıtsınalyq saqtandyrý júıesin engizýdegi negizgi sebepterge toqtaldy. Onyń aıtýynsha, atalǵan júıeni engizýge demografııalyq kórsetkishterdiń jaqsarýynan halyq sanynyń ósýi, ınfektsııalyq emes aýrýlardyń artýy, ınflıatsııa jáne jańa jabdyqtar men dári-dármekter qunynyń qymbattaýy túrtki bolǵan.
«Kepildendirilgen tegin medıtsınalyq kómek kóleminiń ataýly shyǵyndary 2006 jylǵy 209 mlrd teńgeden 2016 jyly 884 mlrd teńgege deıin, ıaǵnı 4 eseden asa óskenine qaramastan, bul shyǵyndar deńgeıi jalpy ishki ónimge qaraǵanda jaǵymsyz úrdiske ıe. Ol 2009 jylǵy 2,6 paıyzdan 2016 jyly 1,9 paıyzǵa deıin tómendegen. Búgingi kúni kepildendirilgen tegin medıtsınalyq kómek kólemin qarjylandyrýdaǵy tapshylyq 541 mlrd teńgeni nemese qajettiliktiń 38 paıyzyn quraıdy», - dedi L.Aqtaeva.
Vıtse-mınıstrdiń dereginshe, statsıonarlyq medıtsınalyq kómek, onyń ishinde joǵary tehnologııalyq medıtsınalyq qyzmet 61 mlrd teńgege, konsýltatıvtik-dıagnostıkalyq qyzmet 51 mlrd teńgege, ambýlatorııalyq dárilik qamtamasyz etý 41,9 mlrd. teńgege, onkologııalyq qyzmet 37 mlrd teńgege jetkiliksiz qarjylandyrylǵan. Sapalyq ózgerister úshin negizgi quraldardy jańartý jáne medıtsınalyq qyzmetkerlerdiń áleýmettik jaǵdaıyn arttyrýǵa qosymsha 316 mlrd teńge de qajet.
«Sonyń saldarynan halyq tegin kórsetilýge tıisti medıtsınalyq qyzmetterge aqy tóleýge májbúr. Sonymen birge halyqtyń «qaltalyq» tólemderiniń úlesi densaýlyq saqtaýǵa jumsalatyn jalpy shyǵyndar qurylymynda 2011 jylǵy 31 paıyzdan 2015 jyly 39 paıyzǵa kóbeıgen. Eýropa elderinde «qaltalyq» shyǵyndar úlesi 16,3, EYDU elderinde 19,6 paıyzdy quraıdy», - dedi ol.
Esterińizge sala keteıik, Memleket basshysy Nursultan Nazarbaev 2017 jyldyń 4 qyrkúıeginde Parlament palatalarynyń birlesken otyrysynda elimizdiń densaýlyq saqtaý salasyn damytý úshin medıtsınalyq saqtandyrý júıesiniń progressıvtiligin aıta kele, QR Úkimetine MÁMS júıesine barlyq sanattaǵy azamattardyń teń dárejede qatysýyn qamtamasyz etýdi tapsyrdy. Birinshi kezekte Elbasy medıtsınalyq kómekke qoljetimdilik jáne «ózin-ózi qamtamasyz etetinder» sanatyna jatatyn 2,7 mıllıonnan astam qazaqstandyqtardyń MÁMS júıesine qatysý sharttary týraly máselelerge erekshe mán berdi.