Halyqqa tegin qyzmet kórsetken medıtsına uıymdaryna 305 mlrd teńge tólendi
NUR-SULTAN. QazAqparat - «Áleýmettik medıtsınalyq saqtandyrý qory» KEAQ jyl basynan beri memlekettik tapsyrys boıynsha kórsetilgen qyzmetter úshin 305 mlrd teńge tóledi. Qarjy kepildendirilgen tegin medıtsınalyq kómek paketi (TMKKK) sheńberinde bólindi, dep habarlaıdy aktsonerlik qoǵamnyń baspasóz qyzmeti.
«2019 jyldyń mamyryndaǵy málimetter boıynsha, Qormen kelisimshart bekitken jetkizýshi kompanııalarǵa 305 mlrd teńge tólendi. Bul jalpy kepildendirilgen medıtsınalyq kómek paketi sheńberinde bekitilgen kelisimshart somasynyń 35,4 paıyzyn quraıdy», - dedi MSQ basqarma tóraǵasynyń orynbasary Botagóz Jaqselekova.
2019 jyly MSQ kepildendirilgen kómek túrlerin kórsetýge qulshynys bildirgen medıtsına uıymdarymen 860 mlrd teńgeniń kelisimshartyn bekitken bolatyn. Bul ótken jyly bólingen qarjydan 5 protsent artyq.
«Jumys kestege saı júrip jatyr. Bólingen qarajat medıtsına mekemeleriniń operatsııalyq shyǵyndaryn óteýge jetkilikti», - dedi Botagóz Jaqselekova.
Bıylǵy jyly memlekettik tapsyrysty 1403 medıtsına uıymy oryndaıdy. Onyń ishinde 701 jekemenshik klınıka da bar. Bıyl olardyń sany 2018 jylmen salystyrǵanda 57-ge kóbeıip otyr.
Memlekettik tapsyrysty oryndap jatqan jekemenshik medıtsına uıymdarynyń sany jaǵynan Shymkent, Nur-Sultan, Almaty qalalary, Qyzylorda, Jambyl jáne Qaraǵandy oblystary kósh bastap tur.
Esterińizge sala ketsek, MSQ 2018 jyldan bastap TMKKK jáne mindetti áleýmettik medıtsınalyq saqtandyrý (MÁMS) paketteriniń qarjylyq operatory bolyp tabylady jáne halyqqa kórsetiletin medıtsınalyq qyzmetterdi QR Úkimeti bekitken tártip boıynsha satyp alady.
