Halyqqa qyzmet kórsetý ortalyqtarynyń jumysy qalaı ózgeredi

ALMATY. QazAqparat – Almatylyqtar memlekettik qyzmettiń 80% Halyqqa qyzmet kórsetý ortalyqtarynan emes, ákimdikter janyndaǵy keńselerden, oqý oryndary men medıtsınalyq uıymdarda ornalastyrylatyn óz-ózine qyzmet kórsetý sektorlarynan alatyn bolady. Bul týraly «Azamattarǵa arnalǵan úkimet» memlekettik korporatsııasy Almaty qalasy fılıalynyń dırektory Danııar Qyryqbaev aıtty, dep habarlaıdy QazAqparat tilshisi.

Danııar Qyryqbaevtyń aıtýynsha, Almatyda karantın rejımi aıaqtalǵannan keıin Halyqqa qyzmet kórsetý ortalyqtary ashylady jáne olar turǵyndarǵa jańa formatta qyzmet kórsetetin bolady.

«Ózgerister HQO-da kórsetiletin memlekettik qyzmet túrlerine ǵana emes, olardy usyný formatyna da qatysty bolady. Eger ret-retimen aıtar bolsam, birinshiden, endi almatylyqtar HQO-da elektrondy formatta qoljetimsiz, tek «qaǵaz» júzinde kórsetiletin qyzmetter (mysaly, jeke kýálikti, tólqujatty aýystyrý, zeınetaqy tólemderin taǵaıyndaý) men egov.kz arqyly rásimdelgen ótinishterdiń nátıjesin alý úshin ǵana kele alady. Ekinshiden, endi HQO-ǵa barý úshin 1414 baılanys ortalyǵy nemese egov.kz saıtyndaǵy arnaıy servıs arqyly kezek ýaqytyn aldyna ala brondaý qajet bolady»,– deıdi D.Qyryqbaev.

Sonymen qatar, ol azamattar elektrondy formatqa aýdarylǵan jáne egov.kz portalynda qoljetimdi barlyq memlekettik qyzmettiń 80% ákimdikter janyndaǵy keńselerden, oqý oryndarynan, medıtsınalyq uıymdardan jáne taǵy basqa jerlerde ornalastyrylatyn óz-ózine qyzmet kórsetý sektorlarynan ala alady.

«Qazirgi kúni ondaı mekemelermen kelissózder júrgizilip, óz-ózine qyzmet kórsetý sektorlaryn ashý jumystarymen aınalysýdamyz. Sonymen qatar, Elektrondy sandyq qoltańba burynǵydaı HQO-da berilmeıdi. Olar tek eGov.kz portaly arqyly alynady. Bul, azamattardyń HQO-da kóptep jınalýyn boldyrmaıdy jáne vırýsty juqtyrý qaýpin joıady. Qyzmet alýshylar da óz ýaqytyn únemdeıdi. Qazir front-ofıster jańa formatqa laıyqtalyp qaıta jańartyldy. Bólimder qajetti orgtehnıkalarmen, derbes kompıýterlermen, veb-kameralarmen, sıp-telefondarmen jáne jumysty uıymdastyrý úshin qajetti qural-saımandarmen jabdyqtaldy»,– dedi ol.

Onyń aıtýynsha, HR-mamandary men tálimgerler beınekonferentsııa baılanysy arqyly HQO qyzmetkerlerine jańa format boıynsha dárister ótkizdi.