Halyqqa qyzmet kórsetý ortalyqtarynyń qyzmetkerleri attestattaýdan ótetin bolady

Keń aýqymdy attestattaý aıasynda Halyqqa qyzmet kórsetý ortalyqtary qyzmetkerleriniń kásibı jaramdylyǵy tekseriletin bolady. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.

Bul shara halyqqa qyzmet kórsetý ortalyqtarynyń qyzmetin paıdalanatyn azamattardy sapaly servıs jáne kásibı qyzmet kórsetýmen qamtamasyz etý maqsatynda uıymdastyrylyp otyr. Attestatsııa tapsyrýshylar kompıýterlik testileýden ótedi. Test Qazaqstan Respýblıkasy Konstıtýtsııasy, Qazaqstan Respýblıkasynyń zańnamalaryn, memlekettik qyzmet kórsetýdiń standarttary men tártibi týraly suraqtardan quralǵan. Sonymen birge HQKO qyzmetkerlerine psıhologııalyq test suraqtaryna jaýap berý usynylady.

Sóıtip, testileý barysynda HQKO qyzmetkerlerine suraqtardyń árbir toptamasynyń belgilengen shekteýli talaptar deńgeıinen shyǵýy qajet. Eger qyzmetker azamattarǵa kórsetiletin qyzmet túrlerine qatysty qandaı qujattardyń qajet ekendigi jóninde bilimi jetkiliksiz bolsa, normatıvtik-quqyqtyq negizderdi bilmeıtin bolsa, sonyń saldarynan qajetti ball mınımýmynan ótpegen jaǵdaıda, olarmen eńbek sharty buzylady. Kerisinshe, eń joǵary ball jınaǵan HQKO qyzmetkerleri avtomatty túrde Ortalyqtyń biryńǵaı kadr rezervine tirkeledi jáne olar ortalyqtyń qurylymdyq bólimshelerindegi vakansııadaǵy basshy laýazymdarǵa ornalasýǵa talaptanýyna bolady.

Attestatsııalaý barysynyń ashyqtyǵyn Memlekettik qyzmet kórsetýdi avtomattandyrýdy baqylaý jáne HQKO-nyń jumysyn úılestirý komıtetiniń ókilderi, sonymen birge «HQKO» RMK-nyń jer-jerdegi qyzmetkerleri tikeleı nemese Ahýaldyq ortalyqtardyń múmkindikteri arqyly on-laın rejiminde baqylap otyrady. Sonymen birge attestatsııa ótetin kabınetterde kásipodaq ókilderi men táýelsiz sarapshylar tikeleı qatysady jáne attestatsııalaý protsesi beınetaspaǵa jazylady.