Halyqqa qyzmet kórsetý ortalyqtarynyń ákimdikterge negizsiz berilgeni aıqyndalyp otyr - Z. Bálıeva
ASTANA. Mamyrdyń 25-i. QazAqparat /Qanat Mámetqazyuly/ - Halyqqa qyzmet kórsetý ortalyqtarynyń ákimdikterge negizsiz berilgeni aıqyndalyp otyr. Búgin «QR keıbir zańnamalyq aktilerine ıdentıfıkatsııalyq nómirler máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Zaǵıpa Bálıeva osylaı málim etti,
dep habarlaıdy QazAqparat.
«Halyqqa qyzmet kórsetý ortalyqtary jergilikti atqarýshy organdarǵa berilgennen bastap, Ortalyq qyzmetine qatysty týyndaǵan máseleniń barlyǵyn jergilikti ákimdikter sheshýge tıis bolatyn. Degenmen, qazirgi tańda ondaǵy problemalar barǵan saıyn órship otyr. Sonymen bir mezgilde, «Nur Otan» HDP janyndaǵy Qoǵamdyq keńes HQO-lardyń jergilikti atqarýshy organǵa berilgeni negizsiz ekenin dáleldedi. Ortalyqtardyń ákimdikterge berilgeni ózin-ózi aqtamaıtyndyǵy týraly da qorytyndy jasaldy. Sondyqtan da bul máselege baılanysty Úkimet basshysynyń arnaıy komıssııasy quryldy. Ol komıssııa maýsymnyń 1-ine deıin Halyqqa qyzmet kórsetý ortalyqtarynyń bolashaǵy týraly qorytyndy jasaıtyn bolady», dedi Z. Bálıeva.
Depýtattyń aıtýynsha, bul salada Ádilet mınıstrligi de, jergilikti atqarýshy organdar da Halyqqa qyzmet kórsetý ortalyqtaryn uıymdastyrýǵa qatysty úlken kemshilikter jibergen. «Osy eki organnyń durys jumys atqarmaýynyń kesirinen halyq japa shegip otyr. Sondyqtan da, aldaǵy ýaqytta Halyqqa qyzmet kórsetý ortalyqtaryna jaýap beretin qandaı organ bolmasyn, eń aldymen uıymdastyrý sharalaryn uqypty júrgizgeni abzal. Olaı bolmasa, Ortalyqtaǵy problemalar esh sheshimin tappasy anyq», dedi Z. Bálıeva.
