Halyqqa qyzmet kórsetý ortalyqtaryndaǵy kýálik jasatý merzimin 2 aıdan 1 aıǵa deıin qysqartý qajet - I.Elekeev
ASTANA. Sáýirdiń 23-i. QazAqparat /Aıdar Ospanalıev/ - «Búginde halyqqa qyzmet kórsetý ortalyqtarynda 65 túrli qyzmet kórsetý jónindegi úkimettiń qaýlysy shyqqanmenen memlekettik organdar bul máselege mán bermeı otyr», deıdi Parlament Májilisiniń depýtaty Irak Elekeev.
Bul týraly ol búgin Ádilet mınıstrliginde Memlekettik qyzmetter men ruqsat berý qujattarynyń sapasy men qoljetimdiligin baqylaý jáne oǵan monıtorıng júrgizý jónindegi respýblıkalyq qoǵamdyq keńestiń májilisinde aıtty, dep habarlaıdy QazAqparat.
Onyń paıymdaýynsha, jergilikti atqarýshy organdar bul máseleni sheshe almaı otyr. «Sonymen qatar qazir halyqqa qyzmet kórsetý ortalyqtarynyń jumysyna qatysty taǵy bir másele, qazirgi
tańda azamattardyń jeke kýálikterin alý úshin qyzmet kórsetý ortalyqtaryna eki aı merzim berilgen. Alaıda, kýálikti sonymen qatar ózge organdar arqyly qyzmet kórsetý ortalyǵyndaǵydan áldeqaıda qymbat baǵaǵa, biraq óte qysqa merzimde jasatýǵa bolady. Bizdiń azamattarymyz qandaı da bir aımaqqa májbúrli túrde ketýleri kerek bolsa, olar nege artyq aqsha tóleýleri kerek. Sondyqtan biz qyzmet kórsetý ortalyqtaryndaǵy kýálik jasaýǵa ketetin ýaqytty 2 aıdan 1 aıǵa deıin qysqartý kerek degen sheshimge kelip otyrmyz. Buǵan qajetti múmkindikter bar», dedi depýtat.
Sondaı-aq onyń sózine qaraǵanda, osy ýaqytta jergilikti jerlerdegi halyqqa qyzmet kórsetý ortalyqtaryndaǵy jumys istep júrgen azamattar joǵary bilimdi bolǵanyna qaramastan memlekettik qyzmetker emes. Olardyń aılyq jalaqylary nebári
15-18 myń teńge. Al mundaı jerde uzaq ýaqyt jumys isteý múmkin emes, nátıjesinde onda kadr turaqtylyǵy da birshama problema bolyp otyr.
