Halyqqa qyzmet kórsetý ortalyqtaryna múgedek jandardy jumysqa tartý qajet - Prezıdent ákimshiligi

ASTANA. 20 qarasha. QazAqparat - Halyqqa qyzmet kórsetý ortalyqtaryna múmkindigi shekteýli adamdardy jumysqa ornalastyrý qajet. Mundaı usynysty búgin Astanada ótken memlekettik qyzmetter kórsetý júıesin damytýǵa arnalǵan halyqaralyq konferentsııada Prezıdent ákimshiligi Strategııalyq ázirlemeler jáne taldaý ortalyǵynyń jetekshisi Azamat Ábdimomynov aıtty.

Onyń aıtýynsha, Kólik jáne kommýnıkatsııa mınıstrligi biryńǵaı baılanys ortalyqtarynda memlekettik qyzmet kórsetý máseleleri boıynsha múmkindigi shekteýli adamdardy jumysqa alýdy josparlaýda kórinedi.

«Menińshe, osyndaı adamdardy HQKO-lardyń ózine jumysqa alýdy usynatyn ýaqyt kelgen sııaqty. Onda túrli kedergilerdiń óte kóp ekenin bilemiz. Men bul máseleni kún tártibine qoıý kerek dep oılaımyn. Onyń sheshilýi bir nemese odan da kóp jyldarǵa sozylýy múmkin, degenmen HQKO qyzmetkerleriniń arasynan múmkindigi shekteýli jandardy da kórsek jaqsy bolar edi», - dedi A. Ábdimomynov.

Aıta ketý kerek, konferentsııa jumysyna ortalyq jáne jergilikti memlekettik organdar qyzmetkerleri, ÚEU músheleri, halyqaralyq sarapshylar qatysty.