Halyqqa qyzmet kórsetý ortalyqtaryn jergilikti atqarýshy organdardyń quzyryna berý, erteleý qolǵa alynǵan shara boldy - Májilis depýtaty
ASTANA. Sáýirdiń 23-i. QazAqparat /Aıdar Ospanalıev/ - «Halyqqa qyzmet kórsetý ortalyqtaryn jergilikti atqarýshy organdardyń quzyryna berý, erterek qolǵa alynǵan shara»,
dep esepteıdi Parlament Májilisiniń depýtaty Irak Elekeev. Ol bul pikirin búgin Ádilet mınıstrliginde Memlekettik qyzmetter men ruqsat berý qujattarynyń sapasy men qoljetimdiligin baqylaý jáne oǵan monıtorıng júrgizý jónindegi respýblıkalyq qoǵamdyq keńestiń májilisinde bildirdi, dep habarlaıdy QazAqparat.
Depýtattyń aıtýynsha, halyqqa qyzmet kórsetý ortalyqtarynyń jumysyn qolǵa alý óte utymdy shara boldy. Buny biz tájirıbe júzinde kórip otyrmyz. Alaıda ony jergilikti organdardyń quzyryna bergeli, jaǵdaı jaqsarǵan joq. «Onda turǵyndarǵa kórsetiletin qyzmetterdiń ortalyqtandyrylǵan júıesi qalyptaspaı otyr. Nátıjesinde qazir aımaqtardaǵy halyqqa qyzmet kórsetý ortalyqtarynda uzynsonar kezek. Osyǵan oraı qazir osy salanyń jumysyn jetildirýdegi tıimdi baǵyttardyń biri retinde halyqqa qyzmet kórsetý ortalyqtaryn qaıtadan Ádilet mınıstrliginiń quzyryna berý qajet bolyp otyr. Alaıda Ádilet mınıstrligi osy ortalyqtarda kórsetiletin qyzmettiń jartysyna jýyǵyn ózderi kórsetedi. Qalyptasqan máseleniń taǵy bir sheshimi - halyqqa qyzmet kórsetý ortalyqtaryn Memlekettik qyzmet isteri agenttigine berý. Óıtkeni ortalyqtarda kórsetiletin qyzmet túrlerin tap osy agenttik anyqtaǵan bolatyn. Biraq búgingi kúni agenttik ókilderin bul másele asa tolǵandyryp otyrǵan joq. Sebebi olar qyzmet kórsetý jumystarymen aınalyspaıdy. Árıne, bul máselege qatysty sońǵy sheshimdi úkimet aıtady. Al bizdiń keltirip otyrǵan mysaldar tek usynys qana», dedi depýtat.
