Halyqqa qyzmet kórsetý ortalyqtary jumysyn baǵalaý júıesi iske qosyldy
NUR-SULTAN. QazAqparat - «Azamattarǵa arnalǵan úkimet» memlekettik korporatsııasy QR kodty paıdalana otyryp, Halyqqa qyzmet kórsetý ortalyqtary jumysynyń sapasyn baǵalaý júıesin iske qosty, dep habarlaıdy QazAqparat tilshisi.
Korporatsııa málimetinshe, kelýshiler onyń kómegimen qyzmet kórsetý protsesi, mádenıeti jáne bólimniń ınfraqurylymy sııaqty jaıttar boıynsha óz pikirlerin qaldyra alady. Búginde 500-den astam azamat bul tásildi qoldanyp, halyqqa qyzmet kórsetý bólimderiniń jumys sapasyn baǵalap úlgerdi.
«Elimizdegi 339 bólimniń árqaısysynda kelýshiler QR kody ornatylǵan stendterdi taba alady. QR kodty oqyp-tanıtyn qosymshany paıdalaný arqyly klıentter smartfondaǵy saýalnama paraǵyna birden ótedi. Azamattar onda operatordyń jumysyna kóńili tolǵanyn, qyzmetti alý yńǵaıly bolǵan/bolmaǵanyn, qajet aqparatty ala alǵanyn aıtyp bere alady. Sonymen qatar qyzmet alýshylar ózderiniń tilek-pikirlerin front-ofıs fotosýretin nemese beınesin júkteý arqyly da bildirýge múmkindigi bar», - dep atap ótedi korporatsııanyń baspasóz qyzmetinen.
Atalǵan keri baılanys kelýshilerdiń memlekettik korporatsııa qyzmetine qatysty pikirin bilý jáne olardyń qanaǵattaný deńgeıin anyqtaý úshin qajet. Sondaı-aq saýalnama nátıjeleri bólimderdegi kemshilikterdi anyqtaýǵa jáne olardy jedel joıýǵa múmkindik beredi.
