Halyqqa qyzmet kórsetý ortalyqtary janynan shalǵaı aýyldarǵa baryp qyzmet kórsetetin «utqyr keńseler» ashylady - A. Jumaǵalıev
ASTANA. 13 sáýir. QazAqparat /Qanat Mámetqazyuly/ - Halyqqa qyzmet kórsetý ortalyqtary janynan shalǵaı aýyldarǵa baryp qyzmet kórsetetin «utqyr keńseler» ashylady.
Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine halyqqa qyzmet kórsetý ortalyqtarynyń máseleleri boıynsha ózgerister men tolyqtyrýlar engizý týraly» zań jobasyn talqylaý barysynda Baılanys jáne aqparat mınıstri Asqar Jumaǵalıev osylaı málim etti.
«Jalpy shalǵaıdaǵy aýyldan aýdandaǵy Halyqqa qyzmet kórsetý ortalyǵyna jetý úshin qarapaıym halyqtyń qaltasyna birshama salmaq túsedi. Máselen, jol qatynasy, anyqtamalar alýǵa qatysty basqa da qyzmetterdi qosa eseptegende memlekettik qyzmetti júzege asyrý barysynda bir adamǵa 7 myń teńgeden astam shyǵyn ketedi eken. Sondyqtan da, biz qarapaıym halyqtyń qaltasyna salmaq salmaý úshin «utqyr qyzmet kórsetý» jumysyn qalyptastyratyn bolamyz. Bul rette Halyqqa qyzmet kórsetý ortalyǵynyń «utqyr keńsesi» qurylyp, aptanyń belgili bir kúninde aýyldardy aralyp, halyqtyń qajetti aryzdaryn, ótinishterin jınap, sodan keıin barlyq úderisterdi jergilikti oryndarda atqaryp, keıinnen anyqtamasyn da aýylǵa aparyp taratatyn bolady. Osy baǵyttaǵy josparymyz barshylyq», - dedi mınıstr A. Jumaǵalıev. Onyń aıtýynsha, «utqyr keńselerge» qatysty ákimdikter de qoldaý bildirgen. Endi bıýdjetten arnaıy qarajat bólinse, joba iske aspaq.
Esterińizge sala keteıik, Májilis depýtattary bastamashy bolǵan zań jobasy boıynsha Halyqqa qyzmet kórsetý ortalyqtary ákimdikter qaramaǵynan alynyp, Baılanys jáne aqparat mınıstrliginiń qaramaǵyna ótetin bolady. Toqtala ketetin jaıt, Halyqqa qyzmet kórsetý ortalyqtary 2005-2009 jyldar aralyǵynda Ádilet mınıstrliginiń quzyrynda bolyp kelgen edi. 2010 jyly ortalyqtar jergilikti atqarýshy organdardyń qaramaǵyna ótken bolatyn.
