Halyqqa qyzmet kórsetý ortalyqtary ákimdikten alynyp Baılanys jáne aqparat mınıstrligine beriledi
ASTANA. 13 sáýir. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine halyqqa qyzmet kórsetý ortalyqtarynyń máseleleri boıynsha ózgerister men tolyqtyrýlar engizý týraly» zań jobasyn maquldady.
Atalǵan zań jobasyna Májilistiń bir top depýtattary bastamalyq jasaǵan bolatyn. Tutastaı alǵanda, qujat halyqqa qyzmet kórsetý ortalyqtarynyń jeke jáne zańdy tulǵalarǵa «Jalǵyz tereze» qaǵıdaty boıynsha memlekettik qyzmetter kórsetýine baılanysty qatynastardy retteýdi jetildirý maqsatynda ázirlengen. Osyǵan oraı zań jobasy ortalyqta qamtylǵan fýnktsııalardy jergilikti atqarýshy organdardan aqparattandyrý salasyndaǵy ýákiletti organǵa berýdi kózdeıdi.
Esterińizge sala keteıik, halyqqa qyzmet kórsetý ortalyqtary 2005-2009 jyldar aralyǵynda Ádilet mınıstrliginiń quzyrynda bolyp kelgen edi. 2010 jyly ortalyqtar jergilikti atqarýshy organdardyń qaramaǵyna ótken bolatyn. Osyǵan baılanysty ıaǵnı, jergilikti ákimdikterge berilgennen keıin onyń jumysy halyqqa qyzmet kórsetýdiń sapasyna keri áser etken. «Memleket basshysy halyqqa qyzmet kórsetý ortalyqtarynyń fýnktsııalaryn jergilikti atqarýshy organdardan alyp, baılanys jáne aqparat mınıstrligine berýdi, sondaı-aq ortalyqtardyń sharýashylyq júrgizý quqyǵyn memlekettik kásiporyn túrinde jumys isteýin qoldaǵan bolatyn. Osyny eskergen depýtattar zań jobasyna bastamashy boldy»,-dedi qujat boıynsha baıandama jasaǵan depýtat Aıgúl Soloveva
Onyń aıtýynsha, zań jobasymen jumys barysynda qujat «Jalǵyz tereze qaǵıdaty», «Meken jaıdyń tirkeý kody» sekildi uǵymdarmen tolyqtyrylǵan. Mundaı túzetýler naqtylaý jáne árkelki túsindirýdi joıý maqsatynda engizildi.
Májilis maquldaǵan zań jobasy Parlament Senatyna jiberiledi.
