Halyqqa qyzmet kórsetý ortalyǵyna kezek brondaý jeńildedi

NUR-SULTAN. QazAqparat - Endi halyqqa qyzmet kórsetý ortalyǵyna kezekti brondaý kezinde qyzmet alýshylar kezek alýǵa bolatyn bos ýaqytty kóre alady. Buryn bos oryn joqtyǵyna qaramastan, brondaý tiziminde barlyq ýaqyt kórsetiletin. Bul qyzmet alýshylar úshin qolaısyzdyq týǵyzyp, mázirden qaıta shyǵyp, bos ýaqytty qaıtadan izdeýge týra keletin, dep habarlaıdy QazAqparat «Azamattarǵa arnalǵan úkimet» KEAQ baspasóz qyzmetine silteme jasap.

Sonymen qatar Egov.kz portalynda kezekti qaıta brondaýdyń jańa fýnktsııasy iske qosyldy. Eger azamat aldyn ala jasaǵan brony boıynsha qandaıda sebeptermen HQO-ǵa bara almasa, kezek ýaqytyn qaıta belgilep, paıdalanbaǵan bron ýaqytyn bosata alady.

Bir adamnyń birneshe ýaqyt aralyǵyn birden brondaý múmkindigi de shekteldi. Endi azamattar 10 kúnde bir ret qana bron jasaı alady. Bul rette, HQO men avtoHQO-ǵa jasalǵan bron bólek-bólek eseptelmeıdi, ıaǵnı qyzmet alýshy 10 kún ishinde HQO-ǵa da, mamandandyrylǵan HQO-ǵa da kezekti onlaın qoıa alady.

AvtoHQO-ǵa júginýshi azamattarǵa kólikti qaıta tirketý qyzmeti qajet bolsa, bron kólikti satýshy azamattyń atynda bolý kerektigin eskertemiz.

Atalǵan sharalar brondaý servısindegi kezekti azaıtýǵa jáne neǵurlym kóp azamattyń qyzmet alýyna jaǵdaı jasady.

Atalǵan ózgertýlerdi «Azamattarǵa arnalǵan úkimet» memlekettik korporatsııasynyń bastamasymen egov.kz portalynyń operatory – «Ulttyq aqparattyq tehnologııalar» AQ júzege asyrdy. Buǵan Azamattarǵa arnalǵan úkimetke qyzmet alýshylardan kelip túsken ótinishterdiń analızi men onlaın túrde kezekke turýdy tehnıkalyq jaqsartý qajettiligin anyqtaǵan fokýs-toptyń testileý nátıjeleri negiz boldy.

Sondaı-aq bir jumys kúni ishinde bir JSN ıesi úshin qyzmetterdiń eki túrin brondaý múmkindigi jasaldy, olardyń biri qujattandyrý qyzmetimen baılanysty. Mysaly, eger buryn azamat bir kúnde bir ǵana qyzmet túrine bron jasaı alsa, máselen, jeke kýálik qyzmeti boıynsha, endi sol kúni odan ózge qyzmet túrin alý múmkindigi bar.

Sonymen qatar, endi egov.kz qoldanýshylary elektrondyq úkimet portalyndaǵy jeke kabınetinde tapsyrys berilgen kezeginiń mártebesin kóre alady.

Esterińizge sala keteıik, tótenshe jaǵdaı aıaqtalǵannan keıin Qazaqstannyń halyqqa qyzmet kórsetý ortalyqtarynda onlaın túrde qoljetimsiz, tek «qaǵaz» júzinde kórsetiletin qyzmetterdi alýǵa bolady. Ol úshin HQO-ǵa kezek ýaqytyn aldyn ala egov.kz portaly nemese eGovKzBot2.0 telegram-boty arqyly brondaý kerek.

Bul azamattardyń kóptep jınalmaýy men vırýsty juqtyrý qaýpin azaıtýǵa baǵyttalǵan sharalar.