«Halyqqa qyzmet kórsetetin» deldaldar bir kúnde qansha aqsha tabady

ASTANA. QazAqparat - Búginde kóshi-qon jáne kólikterdi tirkeý boıynsha xalyqqa qyzmet kórsetý ortalyqtarynda deldaldar kóptep júredi. Olar bir kúnde biraz aqsha tabady. Dál osy zańsyz aqshý tabý sxemasyna quqyq qorǵaýshylar da qatysýy ábden múmkin, dep xabarlaıdy QazAqparat tilshisi.

"Jemqorlyqqa qarsy birinshi medıa ortalyq" qoǵamdyq uıymynyń tóraǵasy Tólegen Baıǵulovtyń aıtýynsha, memlekettik qyzmet kórsetiletin barlyq mekemelerde deldaldar bar. Ony arnaıy zertteý de rastap otyr. "Bizdiń esebimizge sáıkes, olar bir kúnde shamamen 100 myń teńge tabady. Oblys ortalyǵynda ǵana emes, aýdan ortalyǵynda da ondaı deldaldar kóp. Para alýshy men para berýshige jaǵdaı jasap qoıǵan ǵoı. Ol jerde júrgen adamdardyń bári bir "sxemamen" jumys isteıdi. Deldaldar xalyqqa qyzmet kórsetý ortalyǵynda otyrǵandarmen, ıa bolmasa, sol jerdegi polıtseılermen birge áreket etedi. Endi, ony quqyq qorǵaýshylar anyqtaýy tıis", - dedi T.Baıǵulov jýrnalısterge bergen suxbatynda.

Onyń sózine qaraǵanda, aldaǵy ýaqytta deldaldarmen kúres sharalary kúsheıe túsedi. "Jyldyń aıaǵyna deıin deldaldardy 70-80 protsentke azaıtýymyz qajet. Qazir biraz qujattardy úıden shyqpaı-aq jasaýǵa bolady dep jatyrmyz ǵoı. Degenmen, sonyń ózinde deldaldardyń sany azaıatyn emes. Bunyń barlyǵy - jasyryn jemqorlyq. Ony qurtý qajet. Negizi, qazirgi kezde sapaly memlekettik qyzmetti alý úshin barlyq jaǵdaılar jasalyp jatyr. Biraq deldaldardyń zańsyz qyzmeti xalyqtyń kózqarasyna keri áserin tıgizip otyr. Adamdar qyzmet alýǵa keledi de, deldaldardyń zańsyz aqsha suraǵanyn kórgennen keıin barlyǵy sondaı dep oılaıdy", - dep atap kórsetti T.Baıǵulov.