«Halyqqa qyzmet etetin qajetti sheshim qabyldanady» - respýblıkalyq basylymdarǵa sholý

***

«Egemen Qazaqstan» gazetiniń jazýynsha, keshe Aqordada QR Prezıdenti N.Nazarbaev Parlament depýtattarynyń, saıası partııalar ókilderiniń qatysýymen keńes ótkizdi. Onda eki taqyryp - Qazaqstan Táýelsizdiginiń 20 jyldyǵyn atap ótý jáne QR Prezıdentiniń ókilettik merzimin 2020 jyldyń 6 jeltoqsanyna deıin uzartý jónindegi referendým ótkizý máselesi sóz bolǵan. «Sóziniń sońynda Elbasy referendým ótkizý týraly óz oıyn bildirdi. Nursultan Nazarbaev: «Halyqqa qyzmet etetin qajetti sheshim qabyldaımyn» dedi. Soǵan qaraǵanda, Memleket basshysy bul másele jóninde oılanyp kóretin sekildi», - dep jazady basylym. Bul maqala «Halyqqa qyzmet etetin qajetti sheshim qabyldanady» degen taqyryppen berilip otyr.

«Keshe Parlament Májilisiniń Tóraǵasy Oral Muhamedjanovtyń jetekshiligimen palata bıýrosynyń kezekti otyrysy ótti», - dep jazady «Egemen Qazaqstan» gazeti. Basylymnyń atap ótýinshe, palatanyń Halyqaralyq ister, qorǵanys jáne qaýipsizdik komıteti depýtattardyń talqysyna bir top zań jobalaryn usyndy. Olardyń arasynda Qazaqstannyń Qyrǵyz Respýblıkasyndaǵy elshiliginiń jáne Qyrǵyz Respýblıkasynyń Qazaqstandaǵy elshiliginiń qajetteri úshin Astana qalasy men Bishkek qalasynda ǵımarattar men jer ýchaskelerin ótemsiz paıdalanýǵa berý týraly eki el arasyndaǵy ózara kelisimdi bekitýdi kózdeıtin zań jobasy bar. Sonymen qatar bıýro otyrysynda Úkimetten kelip túsken jańa zań jobalaryna qorytyndy ázirleý máseleleri qaraldy. Olardyń ishinde elimizdiń keıbir zańnamalyq aktilerine ekologııalyq máseleler boıynsha ózgerister men tolyqtyrýlar engizýdi qarastyratyn, «Qazaqstan Respýblıkasyndaǵy arnaıy ekonomıkalyq aımaqtar týraly» jáne osy zań aktisine oraı keıbir zańdarǵa túzetý engizýdi qarastyratyn zań jobalary bar.

«Alash aınasy» gazetiniń juma kúngi nómirinde jaryq kórgen «Kóne bıznestiń kóleńkesi kóp...» degen maqalaǵa jádigerler tóńiregindegi túıtkilder arqaý bolǵan. «Osy ýaqytqa deıin qazaq topyraǵynda tarıhymyzǵa tyń úles qosatyn nesheme myńdaǵan jádigerler tabylǵanymen solardyń barlyǵy da murajaıdyń tórinen ornyn taba aldy ma? Joq. Jaýhar jádigerlerimizdiń qoldy bolýyna zańymyzdyń solqyldaqtyǵy sebepshi. Negizi kóne buıymdar bıznesi óte kóp tabys túsiretin qomaqty sala bolyp eseptelinedi. Tipti álemdik múıizi qaraǵaıdaı sarapshy-mamandar ony tabysy jóninen úshinshi orynǵa shyǵaryp júr. Ári kóne jádigerlerdiń álemdik naryqtaǵy quny jyl jyljyǵan saıyn 20-30 paıyzǵa deıin ósip otyratynyn alǵa tartady. Sol sebepti de sheteldik kollektsıonerler anaý-mynaý kásipkerińdi shetke yǵystyra alady. Negizi, álemdik talap boıynsha jeke kollektsıonerlerdiń qolyndaǵy ulttyq muraǵa jatatyn kóne jádigerler tizimge alynyp, arnaıy sertıfıkat berilýi tıis. Bul úshin elimizge dál qazirgi tańda antıkvarıat týraly zań aýadaı qajet. Máselen, Reseıde antıkvarıat dúkenderindegi zattardy tek Reseı azamatyna ǵana satýǵa ruqsat bar», - delingen maqalada.

Osy basylymda «Qos «dintanýdyń» qaısysyn tańdaımyz?» degen taqyryppen berilgen maqala mektepterde oqytyla bastaǵan qos dintaný páni tóńiregindegi pikirtalastarǵa arnalǵan. Basylymnyń jazýynsha, 2009 jyly Qazaqstannyń Bilim jáne ǵylym mınıstrligine fılosofııa ǵylymynyń doktory, professor Ǵarıfolla Esimniń jetekshiligimen qurastyrylǵan «Dintaný negizderi» atty oqýlyq usynylyp, atalǵan oqýlyq san ret tolyqtyra otyryp, bas-aıaǵy 11 márte saraptamadan ótpeı, aqyry arnaıy saraptaý komıssııasymen «oqý quraly» retinde bekitiledi. Al BAQ betterinde Ǵ. Esim qurastyrǵan «Dintaný negizderi» oqýlyǵynyń mektep oqýshylarynyń túsinigine óte aýyr bolyp keletini jáne tym ǵylymı ári monografııalyq sarynǵa ıe ekeni jazylyp jatty. Sonymen qatar Bilim jáne ǵylym mınıstrligine professor Dosaı Kenjetaıdyń jetekshiligimen qurastyrylǵan «Dintaný» oqýlyǵy saraptamaǵa usynylady. Saraptamadan ótken bul oqýlyqty Bilim mınıstrligi de bekitedi. Alaıda oqýlyq daýy Mınıstrliktiń mórimen aıaqtalǵan joq. Senator Ǵarıfolla Esim D.Kenjetaıulynyń «Dintaný» oqýlyǵy mektepterge jaramsyz dep esepteıdi eken. Onyń ornyna buǵan deıin mınıstrlikpen «oqý quraly» retinde bekitilgen, óziniń jetekshiligimen qurastyrylǵan «Dintaný negizderin» usynady. Qazir qos oqýlyq ta ta kóptegen syn pikirlerge ushyraýda.

***

«Memleket basshysy Nursultan Nazarbaev «Lýkoıl» kompanııasynyń prezıdenti Vagıt Alekperovty qabyldady», - dep jazady «Kazahstanskaıa pravda» gazeti. Basylymnyń atap ótýinshe, V.Alekperov Prezıdentti «Lýkoıl» kompanııasynyń Qazaqstannyń munaı óńdeý salasyndaǵy 6 mlrd.-qa jýyq AQSh dollaryn quraıtyn ınvestıtsııasy týraly habardar etti. Bıylǵy jyly kompanııa Aqtóbe oblysyndaǵy iri gaz óńdeý keshenin paıdalanýǵa beredi. Sondaı-aq, elimizde iske asyrý úshin birqatar ındýstrııalyq-ınnovatsııalyq jobalar qarastyrylýda. «Qazaqstan shet el ınvestıtsııasynyń senimdi qorǵalýy qamtamasyz etilgen álemniń azdaǵan eliniń biri bolyp tabylady. Bul - Nursultan Nazarbaevtyń jeke eńbeginiń nátıjesi. Búginde ol 20 jyl boıy Qazaqstanǵa tartylǵan ınvestıtsııalardyń kepili bolyp tabylady. Osy 20 jyl ishinde respýblıka qalaı qurylǵanyn, qalalar qalaı salynǵanyn kórińiz. Árıne, bul - Prezıdenttiń eńbegi, onyń ınvestıtsııany yntalandyrý jáne respýblıkanyń salyq salý bazasyn ulǵaıtý úshin júrgizgen saıasatynyń jemisi», - dep atap ótken V.Alekperov.