Halyqqa kondomınımým qurýǵa kedergi jasalyp otyr - Súleımenov
ASTANA. QazAqparat - Úkimettiń búgingi otyrysynda QR Ulttyq ekonomıka mınıstri Tımýr Súleımenov tutynýshylar quqyqtaryn qorǵaýǵa qatysty negizgi máselelerdi atady.
Halyqtyń tarapynan kondomınımýmdy qurýǵa kedergi jasaý boıynsha aryz-shaǵymdar da kóp túsedi, dep xabarlaıdy QazAqparat tilshisi.
"Máselen, turǵyn úı kommýnaldyq sharýashylyq salasynda baspananyń sapasy men basqarýshy kompanııalardyń qyzmetine qatysty aryzdar kóp. Úılerdiń sapasy kelisimshartta kórsetilgen talaptarǵa saı kelmeıdi. Oǵan qosa, qurylys nysandary ýaqytynda paıdalanýǵa berilmeıdi. Úıdi salǵandar ózderiniń qyzmet kórsetý kompanııalaryn tyqpalaıdy. Halyqqa kondomınımým qurýǵa kedergi jasaý áreketteri de joq emes", - deıdi T.Súleımenov.
Onyń aıtýynsha, turǵyn úı-sharýashylyq salasynan bólek qarjy qyzmetteri, ımporttyq taýarlardyń qaýipsizdigi men elektrondy saýdaǵa qatysty aryz-shaǵymdar barshylyq. "Elektrondy saýda-sattyq salasynda tutynýshylardyń quqyqtary durys qorǵalmaıdy. Sebebi satýshy men satyp alýshynyń jaýapkershiligi zańmen bekitilmegen. Elektrondy saýda alańdarynyń naqty mártebesi de joq. Talaptardyń joqtyǵynan baqylaý júrgizilmeıdi", - dep atap kórsetti mınıstr.
Aıta keteıik , otyrys barysynda T.Súleımenov tutynýshylar quqyqtaryn qorǵaýǵa qatysty jańa júıeni engizýdi usyndy. Alaıda Premer-Mınıstr atalǵan bastamany áli de pysyqtaý qajet dep sanaıdy.
