Halyqqa kómek kórsetýde óńirler shet qalmaýy tıis – Azat Perýashev
NUR-SULTAN. QazAqparat - QR Parlamenti Májilisiniń depýtaty, «Aq jol» demokratııalyq partııasy fraktsııasynyń jetekshisi Azat Perýashev pandemııa kezinde halyqqa qandaı qoldaý kórsetilip jatqanyn baıandady, dep habarlaıdy QazAqparat.
«Biz úshin eldegi árbir adamnyń densaýlyǵy asa mańyzdy. Bizdi Qazaqstannyń túrli aımaqtarynda ne bolyp jatqandyǵy alańdatady. Sondyqtan jaǵdaıdy baǵalaý úshin Qostanaı oblysyndaǵy Arqalyq qalasyna bardyq. Jeke óz kestem boıynsha 10 oblysqa barýdy josparladym. Arqalyqta jergilikti aýrýhanalarǵa baryp, dárigerlermen, koronavırýstan qaıtys bolǵandardyń týystarymen sóılesip, dárihanalardy tekserdik. Dárimen qamtamasyz etý boıynsha dárihanalardyń ıeleri bizge shaǵymdanyp, «SQ-Farmatsııanyń» dári-dármek tapshylyǵy joq degen sózine narazy bolyp otyr. Biz úsh kúnimizdi jergilikti dárihanalarǵa arnadyq. Barlyq jerde uzyn-sonar kezek jáne kireberiste satylymda joq dárilerdiń tizimi ilingen. Bul dárihanalarda tapshylyqtyń baryn bildiredi. Biraq aýrýhanalarda tapshylyq joq. Sebebi, SQ-Farmatsııa memlekettik aýrýhanalardy dári-dármekpen qamtamasyz etedi. Jergilikti dárihanalar tek qana memlekettik klınıkalardy qamtamasyz etýge narazy», - dedi depýtat QR Sybaılas jemqorlyqqa qarsy qyzmet uıymdastyrǵan onlaın kezdesýde.
Onyń aıtýynsha, pandemııa kezinde Arqalyq halqyna qoldaý kórsetý maqsatynda úsh jasandy ókpeni jeldetý apparaty satyp alynyp, 20 muqtaj januıaǵa azyq-túlik berilgen. Depýtat kishigirim eldimekenderdiń kómekke muqtaj ekenin umytpaýdy atap ótti.
«Belsendiler bılik pen laýazymdy tulǵalardyń kómegin kútip otyrǵan joq. Olardyń ózderi azyq-túlik, dári-dármek pen medıtsınalyq jabdyqtar satyp alýǵa kómektesip jatyr. Bizdiń azamattyq qoǵam bul máselege mán bere bastady. Dál osyndaı úılesý azamattyq qoǵam men memleket arasynda óte qajet. Alaıda mundaı sharalar tek iri qalalarda ǵana ótedi de, shaǵyn aýyldar umyt qalady. Sondyqtan aýyldar men aýdandardy da qoldaý qajet», - dedi A. Perýashev.
