Halyqqa kómek: Aqtóbelikter basshylardyń qabyldaýynda boldy
Búgin «Nur Otan» partııasynyń oblystyq fılıaly bir jerde otyryp, analardyń suraǵyna jaýap berdi. Jalǵyzbasty analar men kópbalaly qoǵamdyq qabyldaýda ózderin tolǵandyrǵan, sheshimin tappaǵan máselelerin atap ótti. Máselen, Baıan Júsipova jalǵyz ózi eki bala tárbıelep otyr. Qyzdarynyń aldy 8 jasta, al kishisi 1 jastan asty. Ol 5-6 jyl buryn Embi qalasynan kóship kelgen. Qazir turaqty jumysy joq. Aldymen turaqty mekenjaıǵa tirkelip, balalaryna ataýly áleýmettik kómek alǵysy keledi. Jaldamaly páterge tóleıtin aqshasy da joq.
«Oblystyq máslıhattaǵy «Nur Otan» fraktsııasynyń múshesi Sergeı Vışnıak qaryzymdy óteý úshin materıaldyq kómek kórsetetin boldy. Qoǵamdyq qabyldaýǵa kelip, mekenjaıǵa tirkeldim. Ataýly áleýmettik kómek alý úshin oblystyq jumyspen qamtýdy úılestirý jáne áleýmettik baǵdarlamalar basqarmasynyń mamandarynan keńes aldym. ıAǵnı, bir balamnyń qujatyn jınaqtaýym qajet. Mundaı qoǵamdyq qabyldaý halyqqa paıdaly», - dedi Baıan Júsipova. Al Dámejen Qunanbaevanyń naýqas jıeni bastaýysh synypty úıde oqydy. Ol qosymsha úıirmelerge tegin qatysýǵa kómek surady. Aqtóbe oblystyq bilim basqarmasy basshysy Lázzat Orazbaeva aldaǵy ýaqytta dárigerdiń nusqaýymen basseın, dombyra, vokal úıirmelerine qatysýǵa bolatynyn aıtyp berdi.
«Qazaqstannyń Tuńǵysh Prezıdentiniń tikeleı tapsyrmasymen «Halyqqa kómek» jobasy júzege asqan sátten bastap óńirdegi partııalyqtarǵa kópbalaly otbasynan 105 azamat ótinish bildirdi. Olardyń 39 paıyzy jedel sheshimin tapty. Bul rette ótinishterdiń basym bóligi materıaldyq kómek kórsetý, jumysqa ornalastyrý jáne áleýmettik, quqyqtyq kómek ekenin atap ótken jón», - dedi partııanyń Aqtóbe oblystyq fılıaly tóraǵasynyń orynbasary Nurhan Aǵnııazov.
