Halyqqa ákimderdi saılaý quqyǵy berilýi múmkin

ASTANA. QazAqparat - Búgin Parlament Májilisiniń qaraýyna engizilgen konstıtýtsııalyq reformalardyń ishinde "Astana men Almaty qalalary, sondaı-aq oblys ákimderinen basqalardy ákim qyzmetine taǵaıyndaý jáne odan bosatýdy burynǵydaı Prezıdent aktisimen emes, zańmen anyqtaý" týraly usynys ta bar. QazAqparat tilshisine suxbat bergen depýtattar atalǵan ózgeristiń mán-jaıyn túsindirip berdi.

"Iá, "Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly" zań jobasynda ondaı ózgeris bar. Mine, qarańyz, oblystar jáne respýblıkalyq mańyzy bar qalalardyń ákimderi máslıxattardyń kelisimimen Prezıdent taǵaıyndaıdy. Al basqa ákimshilik-terrıtorıaldyq aımaqtardyń ákimderi endi zańmen taǵaıyndalady. Demek, arnaıy zań bolady. Negizi, qazir bizde jergilikti ózin-ózi basqarý týraly zań bar. Soǵan ózgerister engiziletin shyǵar", - deıdi atalǵan zań jobasyn ekinshi oqylymǵa daıyndaý jónindegi birlesken komıssııanyń jetekshisi, depýtat Nurlan Ábdirov.

Májilis depýtaty Azat Perýashev te óz áriptesiniń aıtqan sózin rastap otyr. Alaıda ol óz kezeginde ákimderdi xalyqtyq saılaý arqyly taǵaıyndaý máselesin kóterýge ázir. "Qazirgi kezde ákimderdi taǵaıyndaıdy. Endi, Konstıtýtsııaǵa ózgeris engizgen soń, 300-ge jýyq zańǵa ózgerister engizýge týra keledi. Osy zań jobasynan keıin biz sol jumysqa kirisemiz. Sebebi tıisti zańdardy Konstıtýtsııanyń talaptaryna keltirý kerek. Ákimderge qatysty jergilikti ózin-ózi basqarý zańyna ózgeristerdi engizýge májbúr bolamyz. Menińshe, jergilikti jerde oblystyq qalalarǵa deıingi ákimderdi saılaýymyz qajet. Bálkim, aýdandyq ákimderdi taǵaıyndap, aýyl ákimderin xalyqtyń saılaýyna berý kerek shyǵar. Biz óz partııamyzdyń atynan ondaı usynystardy engizýge daıynbyz. Al ary qaraı qalaı bolatynyn jumys kórsetedi", - dep atap kórsetti Azat Perýashev.