Halykcoin-ge senbeńizder! - Eset Býtın
"Jaqynda buqaralyq aqparat quraldarynda "Halykcoin" atty joba jaıynda aıtyldy. Biz atalǵan jobany jan-jaqty zerdelep shyqtyq. Osy jumysqa qarjygerler de, zańgerler de qatysty. Olardyń saraptamasy boıynsha Halykcoin - bul alaıaqtardyń jobasy. Ony anyq aıta alamyn", - dedi E.Býtın búgin Astanada ótken baspasóz máslıxatynda.
Uıym basshysynyń aıtýynsha, Halykcoin-nyń resmı saıtynda atalǵan jobamen aınalysatyn mekemeniń naqty mekenjaıy jáne taǵy basqa málimetter joq. Sondyqtan ony kim jáne qaı jaqtan iske asyryp jatqany belgisiz. "Ol jigitter bir nárseni jaqsy istedi, bul - Qazaqstan azamattarynan aqsha jınaý mexanızmi. Saıtty ashyp qarasańyz, aqshany kez kelgen ádispen salyp, Halykcoin-dardy satyp alýǵa bolady. Sosyn olar xalyqtyń senimine kirý úshin Halyk bank-tiń sımvolıkasyn paıdalanǵan. Búgingi múmkindikti paıdalanyp, xalyqty Halykcoin-dardy almaýǵa úndeımiz. Sebebi onyń astarynda alaıaqtyq bar dep sanaımyz", - dep atap kórsetti E.Býtın.