Halyqaralyq júk tasymalyndaǵy Qazaqstan kemeleri tıimdi bolyp otyr
ASTANA. QazAqparat - Halyqaralyq júk tasymalyna jumyldyrylǵan Qazaqstan kemeleri ózderin aqtap keledi. Bul týraly Senattyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda Investıtsııalar jáne damý vıtse-mıınıstri Roman Sklıar málim etti, dep habarlaıdy QazAqparat.
Búgin «Teńiz keme qatynasy qaýipsizdigine qarsy baǵyttalǵan zańsyz is-árekettermen kúres týraly konventsııaǵa 2005 jylǵy hattamany ratıfıkatsııalaý týraly» zań jobasy talqylandy.
Roman Sklıardyń sózine qaraǵanda, Hattama lańkestik dep tanylatyn áreketterdiń tizimin keńeıtedi. Kemelerge shabýyl jasalǵan jaǵdaıda jedel áreket etý men kómek kórsetý tetikterin anyqtaıdy.
«2005 jylǵy Hattama biz úshin óte mańyzdy, Qazaqstannyń saýda kemeleri ashyq teńizderdegi porttarǵa deıingi baǵyttardy belsendi túrde ıgere bastady. Jalpy, búginde elimizdiń floty quramynada 300-den astam keme bar, onyń ishinde 12-si halyqaralyq saparlarǵa shyǵady. Ótken jyly otandyq kemeler eleýli kólemde júkterdi tasymaldady», - dedi R. Sklıar.
Osy oraıda byltyr Aqtaý portynan Túrkııaǵa qajetti júkter jetkizilgen eken.
Onyń sózine qaraǵanda, sonymen qatar Qara teńizde 2 tanker munaı tasymalyna tartylǵan. Aldaǵy jyldary alys saparlarǵa shyǵatyn kemeler sany artady degen jospar bar. Sáıkesinshe, júk aınalymy artyp, bul salaǵa tartylǵandardyń tabysy joǵarylamaq.
«Bıyldan bastap 2022 jylǵa deıin Baltyq teńizinen Aqtaý portyna munaı-gaz jobalaryna jabdyqtardy tasymadaý josparlanyp otyr. RF tarapymen bolǵan ýaǵdalastyq arqasynda qazirgi kezdi bizdiń kemeler úshin Reseıdiń ishki sý joldarynda jeńildetilgen tranzıttik tártip engizildi», - dedi vıtse-mınıstr.
Belgili bolǵandaı, búginde 40-tan astam memleket qujattyń qatysýshysy bolyp otyr ári olardyń ishinde Qara teńiz ben Baltyq teńizi mańyndaǵy barlyq memleket bar. Hattamany ratıfıkatsııalaý ashyq teńizde júzetin otandyq kemelerdiń qaýipsizdigin qamtamasyz etýdiń quqyqtyq kepildikterin kúsheıtýge yqpal etedi.
