Halyqaralyq Jáýtikov olımpıadasynda fızıkadan eń joǵarǵy nátıje kórsetken oqýshyǵa Ádilet Imambekov atyndaǵy arnaıy syılyq berildi

Keshe Almatyda márege jetken IH Halyqaralyq Jáýtikov olımpıadasynyń jeńimpazdaryn marapattaý kezinde, endi fızıkadan eń joǵarǵy nátıje kórsetken oqýshyǵa Ádilet Imambekov atyndaǵy arnaıy syılyq taǵaıyndalǵany álemge jarııa etildi. Onyń alǵashqy ıegeri Máskeý qalasy quramasynyń múshesi, Jáýtikov olımpıadasynyń jeńimpazy Ilıa Fradkın boldy. Qazylar alqasynyń turaqty tóraǵasy QR UǴA akademıgi Asqar Jumadildaevtyń usynysymen taǵaıyndalǵan bul syılyq jyl saıyn ultyna, jasyna qaramastan, tek eń úzdik nátıje kórsetken bir oqýshyǵa ǵana tabys etilmek.

«Bul syılyqtyń taǵaıyndalýyn bıylǵy Olımpıadanyń basty jańalyǵy deýge bolady. Qazirgi zamannyń qaharmanyn izdegen kezde onyń esimi birden bizdiń esimizge tústi. Ádilet fızıkadan Reseı komandasynyń kapıtany boldy. Oqýshylar arasyndaǵy jarystardan eshqashan altyn medalsiz qaıtpaǵan ol, Reseı Prezıdentiniń syılyǵyn alady. Sondaı-aq M. V. Lomonosov atyndaǵy Máskeý memlekettik ýnıversıteti janyndaǵy A. N. Kolmogorov atyndaǵy mamandandyrylǵan oqý-ǵylymı ordasyn altyn medalmen jáne Máskeý fızıka-tehnıkalyq ınstıtýtyn «qyzyl» dıplommen aıaqtaıdy. Sosyn Garvardta bilimin jetildirgen Á.Imambekov bul oqý ornynda RhD doktorlyǵyn qorǵaǵan tuńǵysh qazaqstandyq boldy», - deıdi A.Jumadildaev. Onyń aıtýynsha, atalmysh oqý ornynyń talaby boıynsha onda bilim alǵan ǵalymnyń doktorlyq qyzmet jasaýyna ruqsat berilmeıtindigine baılanysty Iel ýnıversıtetinde jumys istep, keremet ǵylymı eńbekter jazǵan onyń jetistikteri joǵary baǵalanyp, AQSh Prezıdenti men KSRO Memlekettik syılyǵyn 3 márte jáne fızıka ǵylymy boıynsha Nobel syılyǵyn ıelengen Lev Landaýdyń arnaıy syılyqtaryn ıelengen tuńǵysh qazaq ǵalymy atandy. 2009 jyldan bastap ómiriniń sońyna deıin Raıs ýnıversıtetinde fızıka jáne astronomııa professory qyzmetin atqaryp kelgen ol óz isimen ǵylymmen shuǵyldanǵan adamnyń qandaı bıikke kóterile alatynyn kúlli álemge pash etti.

Asqar Jumadildaevtyń sózine qaraǵanda, «Ádilet Ońlasynuly tek ǵylymmen ǵana shuǵyldanbaı, sportty da janyna serik etip, alpınızmmen aınalysty. Tipti jeńil atletıkadan da ózindik bıiktikterdi baǵyndyrǵan ol álemniń eń bıik shyńy Evereske shyǵýǵa talaptanady. Onyń aldynda Han táńirine kóterilmek bolǵan Ádilettiń úlken júregi 31 jasqa qaraǵan shaǵynda 2012 jyly 17 shildede 5300 metr bıiktikte mezgilsiz toqtady. Ol az da bolsa sanaly ómir súrdi. Osyndaı tulǵalardyń ómiri bizdiń jastarǵa úlgi-ónege bolýy tıis. Esimderi mektepter men ózge de mekemelerge berilip, abyroıly syılyqtarǵa atyn berý qajet».