Halyqaralyq jasyl tehnologııalar ortalyǵy Qaraǵandy oblysyndaǵy ekologııalyq jobalarǵa kómektesedi
QARAǴANDY. QazAqparat - Qaraǵandy oblysynyń ákimdigi men Halyqaralyq jasyl tehnologııalar jáne ınvestıtsııalyq jobalar ortalyǵy (IGTIC) ózara seriktestik týraly kelisim ornatty, dep habarlaıdy óńir basshysynyń resmı saıty.
Jasyl ekonomıkany damytýda aımaq basshylyǵy Elbasynyń tapsyrmasymen EKSPO-2017 mırasy retinde qurylǵan uıymnyń qoldaýyna ıe boldy.
- Biz birlesip jumys isteýge qyzyǵýshylyq tanytyp otyrmyz jáne qazirdiń ózinde birqatar ortaq jobalardy júrgizip jatyrmyz. Ótken jyly Temirtaýdaǵy «qara qarǵa» qatysty oqıǵadan soń atalmysh ortalyq ta ekologııalyq jaǵdaıdy jaqsartý boıynsha jumystarǵa kirisip ketti, - dedi Qaraǵandy oblysynyń ákimi Erlan Qoshanov.
Kelisim aqparat almasýdy, óńirdi damytý keshendik josparyn qurý, ınvestıtsııalyq, ekologııalyq jáne ǵylymı-bilim berý jobalaryn júzege asyrý kezinde is-áreketterdi úılestirýdi qarastyrady.
Qaraǵandy oblysy ortalyqtyń ózara seriktestik týraly memorandým qurǵan elimizdegi onynshy aımaq bolyp otyr. IGTIC jetekshisi Rapıl Joshybaevtyń aıtýynsha, birlesken naqty jobalar Seriktestik jol kartasyn qurǵan soń anyqtalatyn bolady.
Ortalyq oblysqa EKSPO-2017 qorytyndysy boıynsha iriktelgen jasyl jobalardy júzege asyrýda kómek kórsetýge ýáde berdi.
- 100-den astam joba Astanada ótken EKSPO kórmesin ótkizgen ýaqytta arnaıy komıssııamen iriktelgen bolatyn. Olar engizý maqsatyna sáıkes kelýi boıynsha aımaqtarǵa taratyldy. Onyń ishinde birqatar jobalardy Qaraǵandy oblysy tańdap aldy. Tehnologııalardyń alǵa jyljýyn qadaǵalaý úshin qazir ol baza bizge berildi. Qajet bolǵan jaǵdaıda biz ınvestorlardy izdeýge kómektesetin bolamyz, - dedi Rapıl Joshybaev jýrnalıstermen kezdesý barysynda.
