Halyqaralyq velosıpedshiler odaǵy «Almaty týry» velobáıgesin ótkizýge qoldaý kórsetpek
ALMATY. QazAqparat - Búgin Almaty qalasynyń ákimi Ahmetjan Esimov Halyqaralyq velosıpedshiler odaǵynyń (UCI) prezıdenti Braıan Kýksonmen kezdesti.
Bul týraly qalalyq ákimdiktiń saıtynda habarlandy.
Júzdesý barysynda Almatydaǵy velosporttyń damýy týraly talqylandy.
Ákim shahardaǵy velospedshilerdiń sany jyldan-jylǵa artyp kele jatqanyn, qazir tańda olardyń sany 90 myńdy quraǵanyn atap ótti.
«Ótken jyldyń qazanynda qalada tuńǵysh kásibı velobáıge «Almaty týry» uıymdastyrylǵan bolatyn. Biz bul ıgi dástúrdi bıyl da jalǵastyraıyn dep otyrmyz. Bıylǵy dodanyń uıymdastyrylý dárejesi bıik bolmaq. Osyndaı sharalar arqyly qaladaǵy velosporttyń damý bazasynyń negizin qalaıtyn bolamyz», - dedi qala basshysy.
Óz kezeginde Braıan Kýkson «Astana» velokomandasyn álemde tanymaıtyn adam kemde-kem ekendigin aıtyp ótti.
«Almatyda velosport óte jaqsy damyǵan. Biz óz tarapymyzdan «Almaty týry» velobáıgesin ótkizýge qoldaý kórsetetin bolamyz», - dedi Halyqaralyq velosıpedshiler Odaǵynyń prezıdenti.
