Halyqaralyq valıýta qorynyń burynǵy bas dırektory túrmege qamaldy

Rodrıgo Rato 2004-2007 jyldary Halyqaralyq valıýta qoryn basqarǵan, al oǵan deıin Ispanııanyń ekonomıka mınıstri dáne úkimet tóraǵasynyń orynbasary bolǵan. Ol 25 qazanda Soto-el-Real túrmesine qamaldy, dep habarlaıdy DW Ispanııa ІІM janyndaǵy Penıtentsıarlyq  mekemeler bas hatshylyǵyna silteme jasap. Úkim 2017 jyldyń aqpanynda shyǵyp, Joǵary sotta qaıta qaraldy. Alaıda, bul sheshim ózgermedi.

Rotanyń úkimi onyń Ispanııa úkimetindegi, Halyqaralyq valıýta qoryndaǵy qyzmetine qatysy joq. Ol Ispanııanyń Bankia iri bankteriniń biriniń rezervin maqsatqa saı paıdalanbaǵan. Ol bul bankti 2010-2012 jyldary basqarǵan. Ol ókilder shyǵysyn tóleýge arnalǵan korporatıvtik nesıe kartasyn jeke qajettiligine jumsaǵan. Onyń shyǵyny 100 myń eýrony quraıdy. Ol bul qarjyǵa kıim-keshek, alkogoldik ishimdik, ıis sý alyp, meıramhanadaǵy jeke shottaryn tólegen. Nesıelik kartany baqylaýsyz qoldanǵan banktiń 14 basshysy da osyndaı merzimge abaqtyǵa jabyldy.
Bankia prezıdentiniń qylmysy aýdıtorlyq tekseris kezinde anyqtaldy. Bul bank 2010 jyldary álemdik qarjy daǵdarysy saldarynan 3 mlrd eýro joǵaltqan edi. 2012 jyly bank kúıreýge ushyrap, Eýroodaq nesıeleriniń kómegine júgingen. Rato daǵdarystyń aldyn ala almaı, birneshe qate sheshim qabyldap, banktiń jaǵdaıyn nasharlatyp jibergen.
Aqsha jymqyrý, bank aktıvteriniń izin jasyrý, salyq tólemeýge baılanysty 2017 jyldyń jazynda qozǵalǵan óndiristik is áli de jalǵasyp jatyr. Osy ispen aınalysyp jatqan Madrıd qalalyq №31 soty málim etkendeı, Rato offshorlarda, atap aıtqanda Panamada 8 mln eýro jymqyrǵan. Ratonyń ózi bul qylmystardy joqqa shyǵarýda. Onyń aıtýynsha, offshorlarda onyń otbasynyń kapıtaly, sonyń ishinde ákesiniń - iri kásipkerdiń murasy saqtaýly tur. Ispanııa salyq vedomstvosynyń deregi boıynsha, Ratonyń dáýleti 27 mln eýro dep baǵalanyp otyr.

El Confidencial bedeldi ınternet-basylymynyń málimeti boıynsha, Rato qazir Joǵarǵy sottyń shyǵarǵan úkimine shaǵym túsirmekshi. 

Foto: InoSMI