Halyqaralyq valıýta qorynyń boljamynsha, Qyrǵyzstan ekonomıkasy 2011 jyly 7,1 paıyzdyq ósimge qol jetkizedi
ALMATY. Qazannyń 28-i. QazAqparat /Erlik Erjanuly/ - Qyrǵyz Respýblıkasynyń ekonomıkasy bıyl 3,5 paıyzǵa tómendeýi múmkin. Bul búgin Almatyda Halyqaralyq valıýta qorynyń Kavkaz ben Ortalyq Azııa elderiniń ekonomıkalyq damýy týraly boljamyna jasaǵan esebin tanystyrýǵa arnalǵan baspasóz máslıhatynda aıtyldy.
Halyqaralyq valıýta qory aǵymdaǵy jyly Kavkaz ben Ortalyq Azııa aımaǵyndaǵy elderde aǵymdaǵy jalpy ishki ónimniń ósimi 5,7 paıyz deńgeıinde bolady dep boljam jasap otyr. Ekonomıkanyń qalpyna kelý úrdisi Qyrǵyzstannan (-3,5 paıyz) basqa elderdiń bárinde de baıqalyp otyr. Máselen ósim Armenııada - 4; Ázirbaıjanda - 4,3; Grýzııada - 5,5; Qazaqstanda - 5,4; Tájikstanda - 5,5; Túrikmenstanda - 9,4: Ózbekstanda - 8 paıyzdy quramaq.
Halyqaralyq valıýta qorynyń Qyrǵyz Respýblıkasyndaǵy turaqty ókili Koba Gvenetadzeniń aıtýynsha, memlekettik tóńkeris bul eldegi ekonomıkalyq ahýalǵa keri áserin tıgizip otyr. Degenmen ekonomıkalyq daǵdarystan aıyǵý úrdisine baılansty Qyrǵyzstan ekonomıkasyn qalpyna keltirýge shet memleketter tarapynan kórsetiletin kómek kólemi ulǵaıýda. Bul aldaǵy jyly eldegi ekonomıkalyq ósim kóleminiń 7,1 paıyzǵa deıin ulǵaıýyna múmkindik bermek. Al Kavkaz ben Ortalyq Azııadaǵy ózge elderde: Armenııada - 4,6; Ázirbaıjanda - 1,8; Grýzııada - 4; Qazaqstanda - 5,1; Tájikstanda - 5; Túrikmenstanda -11,5; Ózbekstanda -7 paıyzdy quraıdy dep boljanýda.
