Halyqaralyq valıýta qorynyń basshylyǵynan úmitker eki kandıdat anyqtaldy
ASTANA. 14 maýsym. QazAqparat - Halyqaralyq valıýta qorynyń Atqarýshy keńesi basqarýshy dırektorlyqqa óz kandıdatýralaryn usynyp otyrǵan eki úmitkerdi qaraıdy.
Olar - Frantsııanyń ekonomıka mınıstri Krıstın Lagard jáne Meksıka Ortalyq bankiniń basshysy Agýstın Karstens. Bul týraly RBK agenttigi Qordyń baspasóz qyzmetine silteme jasap habarlady.
Málimdemede atap kórsetilgendeı, qordyń basqarýshy-dırektory qyzmetine kandıdatýralardy usynýdyń merzimi 10 maýsymda aıaqtaldy. Halyqaralyq valıýta qory jańa basqarýshy-dırektordy 2011 jyldyń 30 maýsymyna deıin saılaýdy josparlap otyr.
"Saılaý protsedýrasyna deıin Atqarýshy keńes Vashıngtonda kandıdattarmen kezdesýler ótkizip, «olardyń kúshti jaqtarymen tanysýdy» josparlaýda", - delingen resmı aqparatta.
Halyqaralyq valıýta qorynyń buǵan deıingi basshysy Domınık Stross-Kan 2011 jyly 14 mamyrda Nıý-Iorkte adam zorlamaq boldy dep aıyptalyp, isti bolǵan edi. Qazir ol úıqamaqta otyr, al onyń isi sotta qaralýda. D.Stross-Kan ózine taǵylǵan aıyptaýlardyń bárin teriske shyǵarýda. Degenmen, 19 mamyrda málimdeme jasalyp, onyń Halyqaralyq valıýta qorynyń basshysy qyzmetinen ketetini jarııalandy.
