Halyqaralyq valıýta qory Qazaqstan ekonomıkasyna baǵa berdi

Mıssııa jetekshisi Mark Hortonnyń aıtýynsha, qazirgi kezde Qazaqstannyń ekonomıkasy birtindep kóterilip keledi.

«Shynymdy aıtsam, biz ózimiz de tańqaldyq. Bizdiń boljamymyz boıynsha bıyl Qazaqstannyń ekonomıkalyq ósimi 4 protsentten tómen bolady. Degenmen, atalǵan kórsetkish odan da joǵary bolýy ábden múmkin. Shamamen, 4-4,5 protsenttiń aınalasynda. Qazaqstannyń memlekettik organdary da biz aıtqan boljamnan joǵary bolady dep otyr. Bálkim, bizdiń boljamymyz qate bolyp shyǵady. Degenmen, barlyǵy qazirgi reformalardyń sátti iske asýyna baılanysty bolady. Sosyn ekinshi deńgeıli bankterdi saýyqtyrý sharalary qalaı ótedi, ekonomıkalyq ósim de solaı bolady. Sebebi el ekonomıkasyn nesıelendirý kólemin arttyrý qajet», - dedi M.Horton Astanada ótken baspasóz máslıxatynda.

Onyń aıtýynsha, salyq salasyndaǵy reformalar da ekonomıkaǵa oń áserin tıgizedi. Atap aıtqanda, Halyqaralyq valıýta qory jalaqysy tómen azamattardyń kiris salyǵyn tómendetý sııaqty sharalardy qoldap otyr. Alaıda joǵary jalaqy alatyndardyń progressıvti mejesin kóterý qajet dep sanaıdy. Sonyń esebinen jeńildik sharalaryn aqtaýǵa bolady. Al bilim men densaýlyq salasynda adam basyna qaraı qarjylandyrý tetigi engizýdiń nátıjesinde bıýdjettiń biraz qarajatyn únemdeýge múmkindik bar. Ol da óz áserin beredi.

«Ulttyq bank ta óz jumysyn oıdaǵydaı atqaryp keledi. Inflıatsııanyń deńgeıi 6 protsenttiń aınalasynda. Atalǵan kórsetkishti tómendetý maqsatynda tıisti sharalar atqarylyp keledi. Teńge baǵamy da qatty ózgergen joq. Oǵan, kóbinese, munasy baǵasy men rýbldiń baǵamy áser etip otyrady. Geosaıası faktorlar da bar. Jalpy, búginde ekonomıkalyq ósim baıqalady. Endi, Ulttyq bank pen memlekettik organdarǵa ekonomıkany qarjylandyrýdy azaıtý qajet. Bıznes birinshi orynǵa shyǵýy tıis. Oǵan taǵy bir-eki jyl kerek shyǵar. Degenmen, qazirgi bastamalardyń barlyǵyn aıaǵyna deıin jetkizgen jón. Sonda ǵana ekonomıkalyq ósimniń kórsetkishi artady», - dep atap kórsetti M.Horton.