Halyqaralyq uıymdar Ortalyq Azııadan kelgen mıgranttarǵa arnalǵan jańa óńirlik baǵdarlama bastaýdy qolǵa alyp otyr
ALMATY. Maýsymnyń 4-i. QazAqparat /Názıra Eleýhan/ -Halyqaralyq Damý departamenti (HDD) Halyqaralyq kóshi-qon jónindegi uıymy men (HKQU), Birikken Ulttar Uıymynyń áıelderdiń múddesin damytý qory (ıÝNIFEM) men Eýrazııalyq Ekonomıkalyq Qaýymdastyǵy (EýrAZEQ) eńbek mıgratsııasy boıynsha Qazaqstan Respýblıkasynda, sonymen qatar, Qyrǵyz Respýblıkasynda, Reseı Federatsııasy men Tájikstanda 2010 - 2013 jyldar aralyǵyna arnalǵan óńirlik baǵdarlamany iske asyrýdy bastaıdy.
Bul týraly búgin joǵaryda atalǵan uıymdardyń ókilderi Almatyda ótken arnaıy baspasóz máslıhatynda habarlady.
Máslıhat barysynda álemdik ekonomıkalyq daǵdarys jaǵdaıyndaǵy eńbek mıgratsııasy kedeıshilik máselesine tap bolǵan Ortalyq Azııa elderindegi kóptegen otbasylar úshin kúnkóris máseleleriniń sheshimi bolyp tabylyp otyrǵandyǵy atalyp ótildi.
«Kedeıshiliktiń ósý deńgeıi men kóptegen otbasylardyń ómir súrýge qarajatty izdeý qajettiligi eńbek etip júrgen kóship -qonýshylardy zańsyz, ári paıdalaný jaǵdaıynda jumys isteýge májbúrleıdi. Bul kóptegen mıgrant áıelder men er azamattar jáne olardyń otbasylary úshin óte mańyzdy tabys kózi bolyp tabylady. Al, búginde ol áıelder paıdalaný men trafıkke eki ese dýshar bolýda. Eńbek mıgratsııasyn ádette erlerdiń isi dep qarastyrǵanmen, búgingi kúni biz kóshi-qonnyń femınızatsııasyna tap boldyq», dedi TMD elderindegi ıÝNIFEM baǵdarlamalarynyń Óńirlik dırektory Damıra Sartbaeva.
Ortalyq Azııa elderindegi Halyqaralyq kóshi-qon jónindegi uıymynyń Sýbóńirlik úılestirýshisi Zlato Zıgıchtyń pikirinshe, mıgratsııany ómir súrýdiń jalǵyz balamasy dep jasamaı, mıgranttar úshin kóshi-qonnan túsetin paıdany arttyrý múmkindigin damytý kerek.
Joba týraly oıyn bildirgen ol: «Bul baǵdarlama eńbektenýge kóship-qoný jónindegi máselelerdi retteýge járdemdesýge baǵyttalǵan, ol Ortalyq Azııadaǵy kedeıshiliktiń deńgeıin tómendetýge yqpal etetin sheshýshi faktor bolyp tabylady. Joba jasalý barysynda kóship- qonýshylardyń quqyqtaryn qorǵaýǵa, kóship -qonýshylardyń (erler men áıelderdiń), sondaı-aq olardyń otbasylarynyń áleýmettik-ekonomıkalyq jaǵdaıyna basa nazar aýdarylatyn bolady », dep atap ótti ol.
Baǵdarlama Ortalyq Azııadaǵy elderdiń jáne Reseı Federatsııasynyń Úkimetteri men Dúnıejúzilik bank, úkimettik emes uıymdarmen qatar, buqaralyq aqparat quraldarymen tyǵyz yntymaqtastyqta júzege asyralatyn bolady.
Resmı derekterge sáıkes, jyl saıyn Ortalyq Azııadan Reseıge 4,5 mıllıon qoys aýdarýshylar, beıresmı derekterge sáıkes 10 mıllıonǵa jýyq adamdar keledi eken. Al, Qazaqstanǵa resmı derekter boıynsha 200 myń, al beıresmı derekter boıynsha 500 myńnan 1 mıllıonnan astam adam keledi.
