Halyqaralyq Túrki akademııasy Qarabaq týraly jańa kitaptar shyǵardy

NUR-SULTAN. QazAqparat - Nur-Sultanda Halyqaralyq Túrki akademııasynda Túrki Memleketteri Táýelsizdiginiń 30 jyldyǵy aıasynda Qarabaq týraly jańa kitaptar tanystyryldy, dep habarlaıdy QazAqparat tilshisi.

Túrki akademııasy «Qarabaq – Ázerbaıjannyń jaýhary: tarıhy, mádenıeti, tabıǵaty», «Joǵalǵan baqyt: Qarabaqtyń shynaıy oqıǵalary» jáne «Ázerbaıjan Halyq Respýblıkasy» kitaptaryn shyǵardy.

«Halyqaralyq Túrki akademııasy Qarabaq máselesinde árdaıym Ázerbaıjannyń janynda boldy, qoldady. Búgin bizdiń eń úlken tartýymyz – Qarabaq týraly albom-kitap pen Ázerbaıjan Respýblıkasynyń júz jyldyǵyna arnalǵan kitap jáne Qarabaqtyń shynaıy oqıǵalary týraly áńgimeler jınaǵy jaryq kórdi. Oǵan ótken jyldan beri jyl boıy daıyndyq júrgizdik. Sapaly sýretter men materıaldardy jınastyrdyq. Bizdiń bul kitapty baspaǵa berýimiz Ázerbaıjannyń Shýshany alýymen sáıkes keldi», - dedi Halyqaralyq Túrki akademııasynyń prezıdenti Darhan Qydyráli elordada jańa kitaptardyń tusaýkeserinde.

Onyń aıtýynsha, úsh kitap ta qazaq tilinde jaryq kórgen. Al Qarabaq týraly áńgimeler jınaǵy – ázerbaıjan tilinen ózge tilde jaryq kórgen jáne halyqaralyq uıym tarapynan shyǵarylǵan alǵashqy kitap.

Alqaly jıynǵa Halyqaralyq Túrki akademııasynyń prezıdenti Darhan Qydyráli, Ázerbaıjan Respýblıkasynyń Qazaqstandaǵy Tótenshe jáne Ókiletti elshisi Rashad Mammadov, Qyrǵyz Respýblıkasynyń Qazaqstandaǵy Tótenshe jáne ókiletti elshisi Jeenbek Kýlýbaev, Ózbekstan Respýblıkasynyń Qazaqstan Respýblıkasyndaǵy Elshiliginiń birinshi hatshysy Mýzaffar Ýsmanov, S.Seıfýllın mýzeıiniń dırektory Nesipbek Aıtuly, Ázerbaıjan ulttyq májilisiniń mádenıet komıtetiniń basshysy, qoǵam qaıratkeri, jýrnalıst Ganıra Pashaeva jáne túrkııalyq jazýshy, Eýrazııa jazýshylar odaǵynyń tóraǵasy ıAkýp Ómeroǵly jáne basqa da memleket jáne qoǵam qaıratkerleri, Qyrǵyzstan, Ózbekstan jazýshylary, zııaly qaýym ókilderi qatysty.