Halyqaralyq tórelik sottyń bedeli óte joǵary- Erlan Qojasbaı
ALMATY. 17 naýryz. QazAqparat /Erlik Erjanuly/ - Aralyq sotta daýlasýshylardyń 30 paıyzy sotqa deıin-aq beıbit kelisimge keledi.
Bul búgin Almatyda Halyqaralyq tórelik jáne QR Saýda-ónerkásip palatasynyń janyndaǵy Aralyq sot arbıtrlarynyń kezdesýinde aıtyldy.
"Sottardyń júktemesi joǵary. Onda isti qaraý barysy uzaq ýaqytqa sozylyp ketedi. Odan kásipker aqshasyn da, ýaqytyn da joǵaltady. Al Aralyq sotta is 1 ret qana qaralady. Daýlasýshy taraptar arbıtrdi ózderi tańdap, sot otyrysy ýaqytyn ózderi belgileıdi. Onda is 1 aıdyń ishinde qaralyp, eki tarap ortaq sheshimge keledi. Tájirıbe kórsetkendeı, Aralyq sotta daý-damaıdyń 30 paıyzy sotqa deıin sheshilip, daýlasýshylar ózara beıbit kelisimge keledi", - deıdi QR Saýda-ónerkásip palatasynyń prezıdenti Erlan Qojasbaı.
Jalpy QR Saýda-ónerkásip palatasy janyndaǵy Halyqaralyq tórelik sot pen Aralyq sottyń arbıtrleriniń jańa tizbesi 2010 jyly 22 shildede bekitilgen edi. Onda 250 adamnyń 105-i iriktep alyndy. E.Qojasbaıdyń sózine qaraǵanda, byltyr Halyqaralyq tórelik sot pen Aralyq sottyń basqarý organy da qaıta jańardy. QR Saýda-ónerkásip palatasy daýdy sheshýdiń utymdy jolyn nasıhattaý maqsatynda elimizdiń barlyq aımaqtarynda turaqty túrli kezdesýler ótkizip, Aralyq sottyń artyqshylyqtaryn túsindirý jumystaryn júrgizýde. Óıtkeni Aralyq sot týraly estigenmen onyń jumysynyń tıimdiliginen áli de habarsyz kásipkerler az bolmaı otyr. Olar ózara daý-damaılaryn sheshýde áli de Sotqa júginýin jalǵastyrýda. Sot úderisi kezinde olardyń utqanynan utylǵany kóp. Ony Joǵarǵy sot tóraǵasy da moıyndap otyr.
