Halyqaralyq statıstıkalyq uıymdar Qazaqstannyń statıstıkalyq qyzmetine baǵa berdi
ASTANA. QazAqparat - Halyqaralyq statıstıkalyq úsh uıym - Eýropalyq ekonomıkalyq komıssııa, Eýropalyq erkin saýda qaýymdastyǵy jáne Eýrostat QR UEM-niń statıstıka qyzmetine baqylaý júrgizip, nátıjesin jarııa etti, dep habarlaıdy «QazAqparat» HAA tilshisi.
Jahandyq baǵalaý Statıstıka komıtetiniń suraýymen 2016 jyldyń qazan aıy men 2017 jyldyń naýryz aıynda júrgizilgen. BUU Eýropalyq ekonomıkalyq komıssııasynyń mamany Stıven Veıl búgingi baspasóz máslıhatynda Qazaqstannyń statıstıkalyq qyzmetin alty bilikti mamannyń júrgizgenin atap ótti. Onyń aıtýynsha, jahandyq baǵalaýdyń maqsaty - belgili bir ýaqytta belgili bir eldiń ahýalyna qatysty aımaqtyq statıstıkaǵa baǵa berý. Osy taldaý arqyly memleketter ekonomıkalyq áleýetin saraptap, keleshekte josparmen jumys atqarýǵa múmkindik ala alady. Úsh halyqaralyq uıym Qazaqstannyń statıstıka qyzmetine sońǵy ret 2008 jyly taldaý júrgizgen.
«2008 jyldan beri statıstıka qyzmeti birshama jaqsaryp qalǵanyn baıqadyq. Mamandardyń kásibıligin erekshe atap ótkim keledi. Sondaı-aq, quqyqtyq qurylymdardyń jumysy jaqsarǵan. Qazaqstandaǵy statıstıka týraly zań halyqaralyq deńgeıge jaqyndap, memlekettik organdar statıstıkalyq kórsetkishterge jıi súıenip keledi. Statıstıkalyq qujattardyń da shymyrlyǵyn baıqaımyz. Barlyq salasyna halyqaralyq tájirıbe engizilýde.Qazaqstannyń statıstıkasy ózge eldermen teńesip kele jatqanyn kórdik», - deıdi Stıven Veıl.
Halyqaralyq komıssııa mamany jetistiktermen birge statıstıka qyzmetiniń tolyqtyrar tusyn da atap ótti. Onyń sózine qulaq túrsek, eń aldymen Qazaqstannyń statıstıka qyzmeti kásibı táýelsizdikke qol jetkizýi kerek.
«Halyqaralyq statıstıkanyń resmı qaǵıdattaryna saı, statıstıka táýelsiz bolý kerek. Mundaǵy statıstıka qyzmetiniń QR UEM quramyna qaraǵanyn bilemin. Biraq, tolyq ashyqtyq úshin táýelsiz agenttik qurýǵa keńes beremiz. Sondaı-aq, quqyqtyq qurylymnyń jaqsarýy boıynsha keńester berdik. Statıstıka boıynsha qosymsha kadrlardy daıarlaýdy usynamyz», - deıdi sheteldik maman.
Qazaqstannyń statıstıka qyzmetine osy mazmundaǵy 100-ge jýyq keńes berilgen. Sózin túıindeı kele Stıven Veıl mundaı taldaý jumystary 2008 jyldan beri Armenııa, Ázerbaıjan, Mońǵolııa, Ýkraına, Belarýs, Grýzııa elderine júrgizilgenin, Qazaqstannyń kórsetkishi atalǵan elderge uqsas ekenin jetkizdi. Sonymen qatar, baspasóz máslıhatynda «Ekonomıkalyq zertteý ınstıtýty» AQ men QR Qarjy mınıstrliginiń ókilderi QR Ulttyq ekonomıka mınıstrligi statıstıka komıtetine óz usynystaryn joldady.
