Halyqaralyq Sokrat syılyǵyna Qazaqstannyń halyq emshileri ıe boldy

Patrıarh Kırıll, Belarýs prezıdenti Aleksandr Lýkashenko, Reseı Memlekettik Dýmasynyń eks-spıkeri Gennadıı Seleznev, Túrkııa prezıdenti Abdolla Gúl jáne qazirgi zamannyń basqa da beldi tulǵalary ıe bolǵan atalmysh syılyq endi, Qazaqstannyń kásibı halyq emshileri respýblıkalyq qaýymdastyǵynyń prezıdenti Baýyrjan Nurjanov pen qaýymdastyqtyń Óskemen qalasyndaǵy fılıalynyń dırektory Bazylhan Dúsipovke buıyrdy.

Eske salaıyq, ótken jyly qarasha aıynda Sokrat syılyǵyn QR halyq ártisi, Qazaqstannyń birinshi baletmeısteri Bolat Aıýhanov alǵan bolatyn.

Agenttik tilshisine suhbat bergen B.Nurjanovtyń aıtýynsha, bul joly halyqaralyq deńgeıdegi beldi syılyq TMD elderiniń ishinde Qazaqstannyń tek eki azamatyna buıyrǵan. B.Nurjanov halyq emshiligimen 18 jyl boıy aınalysyp keledi, al B.Dúsipov bul «kásipke» ómiriniń 36 jylyn arnady. Halyq yqylasyna bólengen emshiler ıgi isterin búgingi kúnge deıin jalǵastyryp keledi.

B.Nurjanovtyń sózine qaraǵanda, Sokrat syılyǵyn taǵaıyndaýshylardyń emshiler týraly málimetter jınaı bastaýyna B.Dúsipov týraly ınternetke ornalastyrylǵan beıne-rolıkter, emshiniń em-domynan shıpa alǵan kópshiliktiń júrekjardy tilekteri men alǵystary sebep bolǵan.

Halyqaralyq Sokrat syılyǵy - kásibı salada jetken jetistikterdiń halyqaralyq deńgeıde moıyndalýy bolyp tabylady. Sondyqtan laýreattardy tańdaý barysynda olardyń minsiz bedeli, qoǵamdyq jáne áleýmettik baǵdarlamalarǵa qatysýy, memleket aldyndaǵy eńbegi jáne jaǵymsyz pikirlerdiń bolmaýy - basty alǵysharttar bolyp tabylady.

Syılyqty tapsyrý 19-22 maýsym kúnderi Ulybrıtanııanyń Oksford qalasynda ótedi.

Qazaqstan Respýblıkasynda halyq medıtsınasy Konstıtýtsııamen qorǵalǵan. 1992 jyly 10 qańtarda «Halyq densaýlyǵy týraly» QR Zańyna alǵash ret Qazaqstan Respýblıkasyndaǵy halyq emshileriniń jumysyn retteıtin bap engizildi. Al 1997 jyly 19 mamyrda «Qazaqstan Respýblıkasy azamattarynyń densaýlyǵyn qorǵaý týraly» jańa Zań qabyldanyp, onda halyq medıtsınasyna jeke bap arnaldy.