Halyqaralyq sharttardy qabyldamaı turyp, olardyń Ata Zańǵa sáıkestigin saraptaý ózekti - Konstıtýtsııalyq Keńes Tóraǵasy
Búgin QR Parlamenti Palatalarynyń birlesken otyrysy barysynda baıandama jasaǵan QR Konstıtýtsııalyq Keńes Tóraǵasy Igor Rogov osylaı málimdedi. Eske sala keteıik, Parlament aldynda Konstıtýtsııalyq Keńes Tóraǵasy «Qazaqstan Respýblıkasyndaǵy konstıtýtsııalyq zańdylyqtyń jaı-kúıi týraly» baıandama jasaǵan bolatyn.
«2009 jylǵy normatıvtik qaýlyǵa sáıkes, Konstıtýtsııalyq Keńes Negizgi Zańnyń 1-i jáne 2-baptarynda kórsetilgenindeı, Respýblıka qabyldaǵan kelisimsharttar arqyly qalyptasatyn halyqaralyq uıymdar men olardyń organdarynyń sheshimderi Konstıtýtsııaǵa qarama qaıshy kelmeýi kerektigin atap kórsetken bolatyn. Respýblıkanyń egemendigi onyń barlyq aýmaǵyna taralatyny jáne Konstıtýtsııa arqyly bekitilgen ýnıtarlylyǵyn jáne memlekettiń aýmaqtyq tutastyǵyn, respýblıkanyń basqarý formasyn ózgertýge jol berilmeıtindigi týraly normalardy buzatyn halyqaralyq uıymdar men olardyń organdarynyń sheshimderi Qazaqstan úshin mindetti bolyp tabylmaıdy. Sonymen qatar, azamattardyń konstıtýtsııalyq quqyqtary men bostandyǵyna selkeý túsiretin halyqaralyq uıymdar men olardyń organdarynyń sheshimderi qoldanylmaıdy. Osyǵan baılanysty, halyqaralyq sharttarǵa qol qoıylǵanǵa jáne olar bekitilgenge deıin Konstıtýtsııaǵa sáıkestigi turǵysynda olardy tekserýdi qosa otyryp, sarapshylyq deńgeıin arttyrǵan jón», - dedi I. Rogov.
Konstıtýtsııalyq Keńestiń pikirinshe, Negizgi Zańnyń ulyqtyǵyn jáne tikeleı qoldanylýyn sózsiz jáne tıisti túrde qamtamasyz etý, konstıtýtsııalyq materıaldyq jáne protsessýaldyq erejelerdi qaltqysyz saqtaý búkil memlekettik jáne qoǵamdyq ınstıtýttar, laýazymdy tulǵalar men azamattar úshin mindetti talap bolyp tabylady. «Halyq qalaýyn zańdarda jáne ózge de mańyzdy memlekettik aktilerde bildirý, sonymen birge azamattardyń jarııa ınstıtýttarǵa yqpal etý rásimderin únemi jetildirý jurtshylyqtyń ishki turaqtylyǵynyń, ekonomıkalyq damýy men ál aýqaty jaqsarýynyń pármendi kepili bolyp tabylady», - dedi Konstıtýtsııalyq Keńes Tóraǵasy Igor Rogov.