Halyqaralyq sharttar memlekettik tilde jasalatyn bolady - Zań jobasy
ASTANA. 14 qańtar. QazAqparat - Búgin QR Parlamenti Senatynyń Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysy bolyp ótti.
Onda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń halyqaralyq sharttar máseleleri boıynsha ózgerister men tolyqtyrýlar engizý týraly» zań jobasy talqylandy. Qujatqa birqatar Májilis depýtattary bastamashylyq jasaǵan bolatyn.
Jalpy, zań jobasynyń maqsaty halyqaralyq sharttar salasyndaǵy zańnamany jetildirý bolyp tabylady. Bul rette qujat boıynsha eki zań jobasyna tolyqtyrýlar men ózgertýler engiziledi. Olar «Qazaqstan Respýblıkasynyń halyqaralyq sharttary týraly» jáne «Qazaqstan Respýblıkasynyń til týraly» zańdary. Sonyń ishinde Qazaqstannyń ulttyq múddesine saı kelmeıtin, ulttyq qaýipsizdigimizge zalalyn tıgizýi múmkin nemese elimizdiń Táýelsizdigine nuqsan keltiretin halyqaralyq sharttardy jasasýǵa jol bermeıtin jańa norma engiziledi. Bul norma kelisimderdi daıarlaý men olardy júrgizýge qatysýshy memlekettik qyzmetshiler úshin negiz qalyptastyratyn bolady. Budan bólek, qazaq tili Qazaqstannyń memlekettigin aıqyndaıtyn basty faktor ekenin eske ala otyryp, Qazaqstan Respýblıkasynyń shet memlekettermen ekijaqty halyqaralyq sharttaryn Qazaqstannyń memlekettik tilinde jáne taraptardyń kelisýi boıynsha ózge de tilderde jasasýy usynylady.
Zań jobasy palatanyń jalpy otyrysyna shyǵarylady.
