Halyqaralyq shahmat týrnırinde qazaqstandyq oqýshylar komandasy kúmis júlde aldy
NUR-SULTAN. QazAqparat – Nur-Sultan qalasynyń №1 mektep-lıtseıiniń shahmat komandasy TMD elderi arasyndaǵy VII Halyqaralyq mektep sporty festıvalinde ekinshi oryn aldy, dep habarlaıdy QazAqparat.
Klassıkalyq shahmattan jeke saıysta Qazaqstan jartylaı fınalda Qazan komandasyn aıqyn basymdyqpen jeńip, fınalda armenııalyq oqýshylarǵa ese jiberip aldy.
Al oǵan deıin ótken dara básekede qazaqstandyq Borıs Cherkasov qola júldeger atanǵan.
«Qazaqstanda oqýshylar arasynda shahmat damyp keledi. «Aqbozat» ulttyq lıgasyn úzbeı ótkizip kelemiz. Sonyń jeńimpazdaryn Qazaqstan Shahmat federatsııasy bedeldi halyqaralyq dodalarǵa jiberedi. Bizdiń oqýshylar Azııa jáne álem chempıonattarynda birneshe dúrkin júldeger bolǵan. Sol «Aqbozat» lıgasynyń jeńimpazdary búgin Qazanda kúmis júldeger atanýy tegin emes», - deıdi QR BǴM Respýblıkalyq deneshynyqtyrý ǵylymı-tájirıbelik ortalyǵynyń bas dırektory Sadyq Mustafaev.
Jalpy, týrnırge Armenııa, Túrikmenstan, Tatarstan, Qazaqstan, Reseı, Ýkraına, Ázerbaıjan, Qyrǵyzstan jáne Moldovadan 26 oqýshy – 10 qurama qatysty.
Qazaqstan komandasy Borıs Cherkasov, Mádı Áshimbaev, Beknazar Kashev jáne Dıana Tynyshtyq syndy daryndy oqýshylardan quraldy.
«Aıtpaqshy, bular kásipqoı shahmatshylar emes, shahmatqa áýestenip júrgen qarapaıym oqýshylar. Mysaly, Armenııada shahmat mektepte tolyqqandy sabaq retinde oqytylady. Al biz Qazaqstanda osy baǵdarlamany 2017 jyly ǵana engizdik. Ol qazirdiń ózinde tamasha nátıje bere bastady», - deıdi Qazaqstan Shahmat federatsııasynyń atqarýshy dırektory Irına Grışenko.
