Halyqaralyq semınarda tehnıkalyq jáne kásiptik bilim salasynyń sapaly oqýlyqtaryn daıyndaý máselesi sóz boldy

ASTANA. 28 qazan. QazAqparat - 25-26 qazan kúnderi Astana qalasyndaǵy Qaztutynýshylar odaǵynyń Saýda-ekonomıkalyq kolledjinde kásiptik salanyń arnaıy pán oqýlyqtaryn ázirleýshilerge arnalǵan halyqaralyq semınar bolyp ótti.

Tehnıkalyq jáne kásiptik bilim salasynyń sapaly oqýlyqtaryn jasaý máselesin «Respýblıkalyq tehnıkalyq jáne kásiptik bilim berýdi damytýdyń jáne biliktilikti berýdiń ǵylymı-ádistemelik ortalyǵy» aktsıonerlik qoǵamy («RǴÁO» AQ) jıi-jıi kóterip júr. Aıta ketý kerek, halyqaralyq semınarǵa QR Bilim jáne ǵylym mınıstrligindegi tehnıkalyq jáne kásiptik bilim salasynyń ókilderi, oqý oryndarynyń oqytýshylary, atalǵan salanyń oqý ádebıetteri men oqý-ádistemelik quraldaryn ázirleýshi avtorlary, áleýmettik seriktester qatysty. Sondaı-aq bul semınarǵa Avstralııadan kelgen Halyqaralyq yntymaqtastyqty damytý jónindegi departament dırektory Pıtr Holden, TAFE dırektorlar qaýymdastyǵynyń múshesi, Challendjer Tehnologııalar ınstıtýty Zertteý jáne bıznes departamentiniń dırektory Darshı Ganeson-Ýats jáne Qurylys jónindegi Salalyq keńes tóraǵasynyń orynbasary Devıd Megı qatysty. Semınar moderatory, «RǴÁO» AQ bas dırektory Ábdimútálip Ábjapparov: «Biz kásiptik salanyń oqýlyǵyn jasaý máselesine nemquraıly qaraǵandy qoıyp, onyń baıybyna jetýimiz kerek»,- dedi. Odan keıin Pıtr Holden myrza Avstralııa tájirıbesin ortaǵa saldy. Ol dál osyndaı másele osydan 20 jyl buryn ózderin tolǵandyrǵany jáne ony qalaı sheshkeni týraly tájirıbelerimen bólisti. Odan ári eki kúnge sozylǵan trenıngti pedagogıka ǵylymdarynyń doktory, professor, Germanııa doktor-ınjeneri, Qazaqstan pedagogıkalyq ǵylym akademııasynyń prezıdenti, oqýlyqtaný ǵylymynyń bilgiri Asqarbek Qusaıynov ótkizip, «TjKB arnalǵan oqýlyqtardy ázirleýdiń negizgi talaptarymen» tanystyryp, oqýlyq jasaýdyń baı tájirıbesimen bólisti. Sóz arasynda tehnıkalyq jáne kásiptik bilim salasy boıynsha oqýlyqtardy baǵalaýdyń 100 ólshemi daıyndalyp jatqandyǵyn atap ótti. Buǵan qosa, semınarda kásiptik bilim salasy oqýlyqtaryn ázirleýshi-avtorlar ózderiniń arnaıy pánderden ázirlegen oqýlyq, ádistemelik quraldary boıynsha áriptesterine sheberlik sabaqtaryn ótkizdi. Semınar sońynda tehnıkalyq jáne kásiptik bilim salasynyń sapaly oqýlyqtaryn daıyndaý jóninde tuşymdy usynymdar qabyldanyp, trenıngke qatysýshylarǵa sertıfıkattar tabys etildi. Qoryta aıtqanda, kúrdeli úderisten turatyn sapaly oqýlyq daıyndaý isine shyndap bet burǵan kásiptik sala oqýlyqtarynyń avtorlary mazmundy trenıngten kóp oı túıip, úlken serpilis aldy.